1836/2026-2027

Aizawl, 18 August 2026: Vawiin khan AMC Auditorium, Thuampui, Aizawl-ah Aizawl Municipal Corporation (AMC) leh Planning & Programme Implementation Department (P&PID) ṭangkawp chuan Local Council zawng zawngte leh Ward Committee-te tan “Sensitization Workshop on Sustainable Development Goals (SDG) and Collection of Urban Indicators Framework (UIF) Data” an buatsaih a. He hun hi Aizawl Deputy Mayor Pi R. Lalawmpuii chuan khuallian niin a hmanpui.

Khuallian Pi R. Lalawmpuii chuan thu sawiin, Local Council-te chu a taka khawtlang  enkawltu an nih avangin an pawimawh hle a, eng thilah pawh khawtlang hruaitute chu koh tel loh theih loh an ni, a ti. Ram leh khawtlang hmasawn nan Sustainable Development (SD) a pawimawh hle a; chuvangin, hmasawnna hna thawh dawn reng rengin hnathawh tur thlan thiam a ṭul thu a sawi. Fund hrang hrang awmte hi a hmanna tur chawpchilh taka ngaihtuah mai lovin, uluk taka ruahmanna lo siam lawk a, khawtlang tana tangkai leh daih rei tur (sustain) thlan chhuah a pawimawh hle a ni, a ti bawk.

Pi R. Lalawmpuii chuan kum 2030 thlir chungin, hmasawnna hnathawhte hian Sustainable Development Goals (SDG) a thlawp ṭha em tih tehna hmangin Ward hrang hrangte inelna buatsaih a nih tur thu leh lawmman pawh tha tak siam a nih tur thu a sawi a; lawmman atan hian AMC pawhin fund cheng nuai 5 (Rs 5 Lakhs) an thawh ve dawn a ni, a ti. He inelnaah hian lawmman la ngei thei tura theihtawp chhuah turin khawtlang hruaitute a sawm a. Khawtlang hmasawnna turin AMC leh veng tina Local Council-te chu tha taka an thawhho zel a tul a ni, Deputy Mayor chuan a ti.

Workshop-ah hian Sustainable Development chungchâng zirhona neih niin Mizoram dinhmun thlirletna neih a ni a. Urban Indicator Framework (khawpui hmasawnna tehna) atana data lakkhawm dan tur inzirtir a nih bakah, data dik leh rin tlak neih a pawimawhziate sawi a ni. AMC chhunga Ward zawng zawngte tana intihsiakna buatsaih turah hian Ward titha zualte lawmman pek an nih dawn bakah, Ward zinga hmasawnna nei ṭha te hnenah “Fastest Moving/Most Improved” lawmman siam tum a ni bawk. He workshop thil tum chu data hmanga veng hrang hrangte leh khawtlang dinhmun hriatchian mai bakah hmasawnna tangkai leh huapzo nei thei tura inzirtir a ni.

Workshop hi AMC Joint Municipal Commisioner Pu Lalremruata Kullai chuan a kaihruai a, zawhna leh chhanna hunin a zui a ni.