No.4636/2020-2021
Pu Lalnunmawia Chuaungo, Chairman, State Executive Committee, Mizoram State Disaster Management Authority leh Mizoram Chief Secretary ni bawk chuan Section 22(2)(h) &24(l) of the Disaster Management Act, 2005 in thuhneihna a pek angin 1.9.2020 leh 30.9.2020 inkara Mizoram chhunga inkaihhruaina kalpui dan tur a hnuaia mi ang hian thupek a ti chhuak.
Order No.B.13021/101/2020-DMR/Pt-III dated 31.08.2020
A hnuaia tarlan inkaihhruaina hi 01.09.2020 amanga 30.09.2020 thleng hman tur a ni a, a hma-a lockdown kaihhruaina lo siam tawh te chu a thlâk (supercede) ang.
I. MIZORAM PUMA INKHUAHKHIRHNA KALPUI TUR TE
A. Inter-State Border
1. Mizoram luhchhuahna inter-state border hawn mek, Bairabi, Vairengte leh Kanhmun kaltlang kawngpuite chu bungraw phur lirthei tan hawn chhunzawm a ni ang. Passenger phur motor tan erawh chuan screening leh quarantine chungchang fel taka ruahman a nih zel theih nan Thawhtanni, Ningani leh Inrinni apiangin 6:00 A.M amanga 2:00 P.M chhung hawn thin a ni ang.
2. Lengpui airport chu bungraw phur (cargo) thlawhna tan hawn chhunzawm a ni ang. Commercial passenger flight-te tan erawh chuan hawn ni a hranpa a chhuah thin a ni ang.
B. Mizorama lo lut te screening leh quarantine chungchang
1. Mizoram-a lo lut reng reng chu entry point-ah uluk taka screening kalpui chhunzawm zel a ni ang a, quarantine-na tur hmun ruatah quarantine tur an ni.
2. Quarantine dan tur fel taka ruahman a nih theih nan Mizoram an rawn luh hma-in mCOVID-19 mobile application mPASS-flight emaw mPASS-entry of persons hmangin an in-register lawk tur a ni.
3. Mizoram-a lo lutte quarantine dan chu Health & Family Welfare Department-in inkaihhruaina a siam anga kalpui a ni ang.
4. Quarantine-a awm/thlen man, ei leh in man leh test-na man pek dan tur erawh chu Notification No.B13021/101/2020-DMR/Pt-III dated 20.07.2020 leh No.B.13021/187/2020-DMR dated 24.07.2020-in a tarlan angin kalpui a ni ang.
C. Sawrkar office leh office dangte
1. Mizoram chhunga Sawrkar office zawng zawngte chu dan pangngaiin an kal ang a, office dangte pawh a hnuaia inkaihhruaina zawm chungin an kal thei ang. Office tinah a hnuaia tarlante hi khauh takin kalpui tur a ni:
a) Head of Department/Head of Office ten khauh takin office chhungah social distancing an kalpui tur a ni.
b) Head of Department/Head of Office tin te chu office vawn fai leh tih thianghlim kawngah mawhphurtu an ni ang a, office chhungah kut silna hmanrua (tui, sahbawn/handwash) an buatsaih ngei ngei tur a ni. Tin, office gate/kawtkaiah kut silna tur emaw hand sanitizer emaw an dah ang a, office building lut tur reng rengin kut an sil vek tur a ni.
c) Office dawr tur reng rengin appointment an la hmasa tur a ni. Appointment (phalna) neia office dawrtu ten office an dawr chhung zawngin mask an vuah ngei tur a ni.
d) Office building leh a chhehvel uluk takin tih thianghlim (disinfect) thin tur a ni.
e) Office hnathawk, damlohna nei sa emaw hrisel lohna bik nei leh nau paite, office kal thei lo te chu chawlh (Commuted Leave) pek theih an ni ang.
f) Tul bikah lo chuan meeting neih loh tur a ni. A huhova inrawn/sawiho ngai thil a awm a nih chuan a theih chin chinah video conferencing leh online mode dangte hman tangkai hram tur a ni.
g) Department emaw office dangte nena indawr tulna thilah chuan email emaw electronic media dang hman hram tum tur a ni.
h) Mipuiin online-a office an dawr a, bill te an pek theih nan a theih chin chinah ruahmanna siam tur a ni.
2. Thu leh awm hma chu Minister-te public interview hun khar rih a ni.
D. Mipui vantlang tana inkhuahkhirhna hriat tur te
1. District headquarters-ah te chuan zan dar 8:30 leh zing dar 4:30 inkarah pawn chhuah khap tlat a ni. Hemi atan hian District Magistrate ten Section 144 CrPC tlawhchhanin thupek an chhuah ang.
2. District headquarters-ah te chuan phalna nei lova vantlang hmuna mi 5 (panga) aia tam awmkhawm khap a ni. District Magistrate ten Section 144 CrPC tlawhchhanin thupek an chhuah ang.
3. Loh theih loh thil a nih loh chuan, kum 65 chin chunglam te, taksa hriselna lama harsatna nei sa te (Chuap thalo, HIV +ve, zunthlum nasa, lungna, kalna, adt.), nau paite leh naupang kum 10 (sawm) hnuailamte chu pawn chhuah loh hram tur a ni. Tin, chhungtin ten mahni chhungkua theuhah hetiang hriselna lama harsatna nei te himna atan ruahmanna an siam tur a ni.
4. Mask vuah hi mahni leh midang himna atan a pawimawh avangin midang nena awmhona-ah vuah ngei tur a ni. Pawn (vantlang/puipunna hmun, dawr, office, damdawiin, clinic adt.) chhuak tur reng reng chuan face mask emaw hmanraw dang hmangin hmai an tuam ngei tur a ni.
5. Vantlang hmun leh dawra kalte chu metre hnih tala inhlata awm tur a ni.
6. Mizoram pawn atanga lo lut, quarantine paltlang lo mikhualte tumahin thlen phal a ni lo.
E. Lirthei hmanga zin veivah leh mipui chet vel chungchang
Mizoram chhung khawkar kawnga khualzin phur lirthei (commercial passenger vehicle) leh city/town bus, taxi, auto rickshaw leh two-wheeler taxi te chuan registration-a seating capacity tarlan aia tam an phur tur a ni lo. Lirthei khalhtute leh an phurh ten face mask an vuah vek tur a ni a, passenger-te hman tur hand sanitizer an pai reng bawk tur a ni. Hemi chungchangah hian motor enkawltu (driver/conductor) ten mawh an phur ang. Driver/conductor-in a zing thei ang berin lirthei chhung, thutna leh vawnbante uluk takin an tithianghlim (sanitize) thin tur a ni.
F. Zirna in, sakhaw biakna hmun leh mipui punkhawmna hmun te
1. School, college, educational leh coaching institution te chu khar chhunzawm an ni ang a, online distance learning erawh kalpui chhunzawm theih a ni. September ni 21, 2020 hnu lama kal dan tur inkaihhruaina chu a hranpa in siam a ni ang.
2. Sakhaw biakna hmunah te chuan mipui punkhawmna huaihawt phal a ni lo. Zing tawngtai inkhawm erawh chu mi 50 (sawmnga) aia tamlo tan neih phal a ni.
3. Mipui ten a hmuna an en theih tur games & sports tournament huaihawt phal a ni lo. Entu mipui punkhawmna tel lo games & sports practice erawh chu neih phal a ni. Amaherawhchu, mi 25 aia tam punkhawm khap a ni.
4. Cinema hall, auditorium, community hall, swimming pool leh hetiang intawllenna hmunte chu khar chhunzawm tur a ni.
5. Mitthi vuina, lungphun, inneihna (man hlan, inneih inkhawm leh reception), anniversary, pawl thila kalkhawmna, book release, etc. ah te chuan mi 50 (sawmnga) aia tam punkhawm khap a ni. Heng hmuna telte chhinchhiahna kimchang (hming, address, phone number leh kal hun te) ziahna bu/register chu a huaihawttu ten an vawng tur a ni.
6. Mitthi vuina bikah hian chhiatni/ thatni puipunna-a kenkawh tur Sawrkar Order No. B.I302I/101/2020-DMR/Pt-III dated 13.08.2020 in a tarlan heng kaihhruainate hi tha taka zawm tur a ni.
a) Mi 50 aia tam punkhawm khap tlat a ni. Chhungkhat laina pawh a tlem thei ang ber kal thin nise, association/pawl aiawh mi 2 (pahnih) aia tam kal loh tur a ni.
b) Social distancing a awm theih nan kohhran/community hall emaw veng chhunga hall remchangah invuina hun hman tur a ni. Hemi atan hian mitthi lawina kohhran leh a veng neitu YMA/YLA/MTP/YCA emaw LLTF/VLTF ten ruahmanna an siam ang.
c) Mitthi vuina-a kal zawng zawngte hming pum, address leh telephone number chhinchhiah tur a ni a, a remchan dan angin YMA/YLA/MTP/ YCA emaw LLTF/VLTF ten ruahmanna an siam ang.
d) Chhiatni/thatni puipunna hmunahte zai/zaikhawm loh tur a ni.
e) Mitthi vuitu tur chu a theih hram chuan kum lama upa lo leh mi hrisel pangngai a ni tur a ni.
f) Mitthi vuina-ah hian kum lama upa te leh hrisel lohna benvawn nei te kal loh tur a ni.
g) Mitthi vuina-ah thingpui sem loh tur a ni.
h) Chhiatni/thatni-ah mipui kalkhawm ten face mask an vuah vek tur a ni a. Thusawi, thupuan leh tawngtai lai phei chuan mask phelh miah loh tur a ni.
G. Bungraw chawkluh leh thiar chungchang
1. Phai atanga bungraw lalut tur leh rawn phurlut tur reng reng chuan mCOVID-19 mobile application-a mPass hmangin declaration an thehlut tur a ni.
2. Driver leh handyman te chu Aarogya Setu-ah in register vek tur a ni.
3. Driver leh handyman, Mizoram atanga bungraw la tura zin chhuak thin te chuan bungraw lak hna an thawh chhung chu midang nen intlawhpawh lovin an thawk ang a, an awm lailawkna tur chu anmahni ruaitu te kut ani ang. COVID-19 test negative result an neih veleh emaw load an lak hnuhnun ber atanga ni 14 hnu-ah midang nen an intlawhpawh thei ang.
4. State pawn lam lirthei driver leh handyman, phai atanga bungrua rawn thiar lut thinte chu an kalphung pangngai angin khaw pawn hmun remchangah anmahniin eirawng an inbawl chawp ang a, khawchhungah midang nen inchiahpiah lovin an bungrua an unload zawh veleh an let leh nghal ang. An bungrua unload chhung hian an motor atanga chhuak lovin, midangte atanga metre 2 (hnih) tala hla-ah an awm tur a ni. Hemi chungchangah hian bungraw neitu ten mawh an phur ang.
5. A chunga tarlan driver leh handyman-te hian kawng laka harsatna an tawh thulhah State Control Room (Toll free 1070, landline 03892335842/2335837 leh mobile 9366331931)-ah phone-in an harsatnate an thlen thei ang.
H. Dawr leh sumdawnna hmun
1. Bazar, dawr, petrol pump/filling station leh sumdawnna hmuna ‘social distancing’ kenkawh chungchangah a neitu ten mawh an phur ang. Tin, tha taka zawm a nih ngei nan LLTF/VLTF ten anmahni bial chhungah hma an la bawk ang. Tin, heng hmunah te hian a hnuaia tarlan kaihhruainate hi zawm ngei tur a ni:
a) Dawrtu leh dawr neitu ten face mask emaw hmanraw dang hmangin hmai an tuam ngei ngei tur a ni.
b) Dawrneitu ten faina, a bik takin kut sil fai, an uar tur a ni. Tin, dawrtu te tan hand sanitizer an chhawp ngei ngei tur a ni.
c) Mi pathum aia tamin dawr an nghak tur a ni lo. Wholesale dawr leh dawr lian (departmental store)-ah te erawh chuan mamawh dan azirin godown/ store lama thawktu nen mi 6 (paruk) thleng an chhawr thei ang a, a zat chiah erawh chu dawr awmna venga LLTF/VLTF ten an bituk ang.
d) Dawrtu te hming, address, contact number leh an dawr hun chhinchhiahna record fel takin a vawng tur a ni.
e) Dawrtu te an intlar a tul changin social distancing an zawm ngeina turin dawr neitu ten ruahmanna an siam tur a ni. Dawr chhungah pawh meter hniha inhlatin an awm tur ani.
f) Loh theih loh thil emaw a hmunhma-in a zir lo a nih loh chuan dawr chhungah dawrtute luhtir loh tur a ni.
g) A theih chinah pawisa fai inhlan kher lova indawr dan (cashless transaction) hman tangkai tur a ni.
2. Gym, beauty parlour, lumehna, spa etc. ah te hian an hmanrua leh equipment uluk taka tihthianghlim (sanitize) reng tur a ni. Customer te hming, address, contact number leh dawr hun chhinchhiahna record fel takin an vawng tur a ni. Heng hmunah te hian tum khatah mi 10 (sawm) aia tam awm phal a ni lova, customer ten social distancing uluk taka an zawm theih nan a neitu/nghaktu ten ruahmanna an siam ang.
3. Dawr zawng zawng chu (damdawi dawr tiam lovin) tlai dar 7:00 hma-in khar vek tur a ni.
4. Loneitu leh huan neitute, ran vulhtute, sangha dil neitute leh a thawktute pawh an hnathawhna hmun theuhvah midang nena inhlat taka hna thawh tur a ni.
5. Mipuiin awlsam zawka thlai leh chawhmeh an hmuh theih nan veng hrang hrangah LLTF/VLTF ten chawhmeh zawrhna tur hmun an ruahman ang a, metre 2 aia in hnaih lo turin thutna an ruahmansak ang. Inrinni-a mipui punkhawm luih luih pumpelh nan kar khatah ni 3 (thum) tal thlai thar leh chawhmeh dang zawrhna hun ruahman thin tur a ni. A tul angin bazar hmun kher ni lo, school kawt zawl, inkhelhna field, tualzawl leh hmun remchangah te ruahmanna siam tur a ni.
II. AIZAWL MUNICIPAL AREA BIKA LIRTHEI VEIVAH DAN TUR
1. Lirthei intlanchhawk dan tur Superintendent of Police (Traffic)-in Notification No.RO/TRF/SP-Noti-7/08/514dated 31.07.2020 (Annexure) a chhuah chu hman tur a ni.
2. Chawlhni (Sunday) ah lirthei tlanchhuah phal a nilo.
3. Chhiat tawh thil leh medical emergency-ah chuan LLTF ten lirthei tlan phalna an pe thei ang.
4. Tul bik dangah leh Aizawl amanga chhuak leh lut turte tan Superintendent of Police (Traffic)-inphalna a pe thei ang. Phalna hi mCOVID-19 mobile application emaw mcovid19.mizoram.gov.in hmangin dil theih a ni.
III. CONTAINMENT AREA/ZONE PUAN CHUNGCHANG
1. The Mizoram Epidemic Diseases (COVID-19) Regulations, 2020 in thuneihna a pek- Chief Secretary leh Deputy Commissioner-te lo chuan containment area/zone leh lockdown an puang thei lova, hei hian veng bil lockdown pawh a huam a ni.
2. A tul dan azirin Deputy Commissioner ten an district chhunga khawi hmun pawh risk assessment mumal tak neiin containment area/ zone-ah an puang ang.
3. Containment area/zone-ah te chuan Deputy Commissioner-in thupek a chhuah te chu zawm tur a ni.
4. Containment area/zone pawna lockdown puan a ngai a nih chuan Central Sawrkar rawnin State Sawrkarin a puang ang.
IV. SCREENING, TESTING, QUARANTINE LEH HRI VEI TE ENKAWL CHUNGCHANG
COVID-19 testing, quarantine mek leh hri pai te enkawl chungchang, COVID Care Centre, Dedicated COVID Health Centre leh Dedicated COVID Hospital te kalpui dan leh heng hmunhma te tihthianghlim chungchangah chuan Health & Family Welfare Department-in inkaihhruaina a siam te chu a tul anga ennawnin khauh taka kalpui tur a ni ang.
V. HREMNA DAN
He thupek zawm lo chu Disaster Management Act, 2005 hnuaia Section 51 amanga Section 60, The Mizoram (Containment & Prevention of COVID-19) Ordinance, 2020 hnuaia Section 5 leh IPC Section 188 hmangin hrem theih an ni.
Sawrkarin heng thuchhuah a siamte hi a tul dan azirin a ennawnin a tidanglam thei ang.
*Annexure*
OFFICE OF THE SUPERINTENDENT OF POLICE
TRAFFIC :AIZAWL : MIZORAM
Ph: 0389 2310003 email:sp-traffic@mizoram.gov.in
No. RO/TRF/SP-Noti-7/08/514
Dated Aizawl, the 31st July, 2020.
PUBLIC NOTICE
Disaster Management and Rehabilitation Department, GOM Order No.B.13021/101/2020-DMR/Pt-III Dt. 31.7.2020 tlawhchhanin Mizoram State Sorkar Notification No.B.12021/10/04-TRP Dt.22.8.2008 leh Section 115 of MV Act, 1988-in thuneihna min pek angin, kei a hnuaia hming ziaktu/sign-tu hian mipuite tana remchan zawk nan leh Covid-19 hrileng mek laka mipui te him zawk nan Aizawl khawpui (AMC area) chhungah ni 1.8.2020 - 31.8.2020 thleng lirthei intlanchhawk/indinchhawk dan tur a hnuai ami ang hian thupek ka chhuah e.
INTLANCHHAWK DAN TUR LEH A HUAM CHIN TUR
1. Intlanchhawk hian mimal motor leh Sorkar motor, Two-Wheeler zawng zawng bungraw phur lirthei zawng zawng a huam ang.
2. Lirthei registration number tawp ber te tlanchhuah theihloh ni chu hetiang hi a ni ang –
Thawhtanni (Monday) ah Registration 1 leh 2 a tawp
Thawhlehni (Tuesday) ah Registration 3 leh 4 a tawp
Nilaini (Wednesday) ah Registration 5 leh 6 a tawp
Ningani (Thursday) ah Registration 7 leh 8 a tawp
Zirtawpni (Friday) ah Registration 9 leh 0 a tawp
* Inrinni (Saturday) ah Lirthei engpawh tlan chhuah phal a ni
*Pathianni (Sunday) ah Lirthei engchi mah tlanchhuah phal a ni lo.
Tlan chhuah phalloh hun hian Zing dar 9:00 atanga Tlai dar 5:30 inkar a huam ang.
3. Mizoram District dang lirthei zawng zawng te, State pawna lirthei register te, Private Motor leh Bungraw phur motor Aizawl khawpui chhunga awm leh rawn tlan lut tur reng reng te pawh intlanchhawk hian a huam ang.
4. Taxi bik chu Sticker A, B leh C hmanga intlanchhawk kalpui mek ang hian Zing Dar 9:00 atanga Tlai Dar 6:30 inkar an intlanchhawk ang. Inrinni (Saturday) bikah Chawhnu Dar 1:00PM atangin Taxi-te hi an vaia tlanchhuah phalsak an ni. Amaherawhchu, Pathianni (Sunday) ah hian lirthei dang ang bawkin tlanchhuah phal a ni lo.
5. Two Wheeler Taxi bik chu Sticker A, B, C, D leh E hmanga an tlan dan tur kalpui mek ang hian Zing Dar 9:00 atanga Tlai Dar 6:30 inkar ah an tlan ang. Inrinni (Saturday) bikah Chawhnu Dar 1:00 atangin tlangdung kawngpui (Main Spine/artery) ah an vaia tlanchhuah phalsak an ni. Amaherawhchu, Pathianni (Sunday) ah hian lirthei dang ang bawkin tlanchhuah phal a ni lo.
A HUAMLOH TUR TE
1. Governor, Chief Minister leh Speaker-te (an carcade tiamin) a huam lovang.
2. Gauhati High Court Judge te a huam lovang.
3. Public service vehicle (passenger phur chi lirthei) City Bus/ Bus, Maxi Cab/ Sumo (State dang registered huamin), Auto Rickshaw, Institution Bus, Department Bus.
4. Police Department motor duty, Traffic Police duty-te, Fire (F&ES) motor, Excise & Narcotics motor duty, Medical & Hospital Emergency duty, Ambulance/Morgue van, Executive Magistrate law and order duty leh emergency duty, Media mi te (MJA sticker tar te chauh), PHE emergency duty leh PHE tuisem, P&E emergency duty, Bawnghnute sem, Chanchinbu sem, AMC hnuaia Bawlhhlawh paih (Garbage) motor duty, Army leh Para-Military Force, Government Department/Office Despatch Rider-te.
5. Rualbanlote tana Special Vehicle-te a huam lovang.
6. District dang atanga Sorkar thil pawimawha duty-te, Law & Order leh Essential Commodities duty-te chu Aizawl Traffic Police-te an hrilh hmasak hnuah an lirthei tlan dan tur ruahmansak an ni ang.
7. HMV/MMV leh a chunglamte: Sairang atanga Zemabawk (NH-54) lama tlan tlang tur te chu Zing Dar 7:00 atanga Chawhnu Dar 1:00 inkarah an tlan thei ang. Tin, Zemabawk lam atanga Sairang lama tlan tlang turte chu Chawhnu Dar 1:30 atanga a tuk zing Dar 7:00 inkarah an tlan tlang thei ang.
Tin, Aizawl khawpui chhunga “Entry Period” neia lirthei tlan thin te chu a hnuai ami ang hian an tlan chhunzawm ang.
1. HMV/MMV ENTRY PERIOD:
AIZAWL CITY : 8:00 PM – 7:00 AM
VAIVAKAWN TO TEMPLE : 8:00 PM – 11:00 PM
TEMPLE TO VAIVAKAWN : 11:30 PM – 6:30 AM
2. TIPPER (SK/LPK (407)/ : 10:30 AM - 4:00 PM
LOAD KING/SML etc.) 6:00 PM - 8:30 AM
ENTRY PERIOD
A chunga a huam loh tur sawi bakah hian eng emaw hriatlawkloh Emergency case leh tul bik tak tak thil ah chuan SP Traffic Office, Treasury Square ah leh Aizawl Traffic Control Room Phone Number: 0389-2322307/ 2313061/ 9366553559 ah te Lirthei tlan phalna Permit hi dil theih a ni ang. Tin, Permit hi mCOVID-19 mobile application hnuaia mPASS–TRAFFIC/ online link hptts://mcovid19.mizoram.gov.in atangin dil theih a ni bawk ang.
He thupek zawmlo man te chu Section 179 MV Act, 1988 leh Section 5(9) of The Mizoram (Containment and Prevention of Covid-19) Ordinance, 2020 hmanga hrem an ni ang.
Sd/-
(RODINGLIANA CHAWNGTHU) MPS
Sr. Superintendent of Police Traffic : Aizawl : Mizoram
