No.4635/2020-2021

Aizawl, the 1st September 2020 : Vawiin atangin ni 3 awh tur Mizoram Legislative Assembly thutkhawm chu neih tan a ni ta a. Session tan hma hian MLA zawng zawng te chuan Assembly Conference Hall-ah Pathian hnena inhlanna hun hmangin tawngtai rualna an nei a ni.

Assembly Speaker Pu Lalrinliana Sailo chuan Ruling party-in tun hma pawhin Session tan hmain Pathian hnenah inhlanna hun an hman thin tih thu a sawi. Heti taka hripuiin khawvel a tuam mek lai hian hripui lakah kan ram kan him zel theihna atan leh Pathian ropuina atan a ruala MLA zawng zawngin hmun khata tawngtai rual hun hman ni se tiin thutlukna siam a ni, a ti.

Pathian hnena inhlanna leh tawngtai rualna hi Rev C. Lalremsanga, UPC Mizoram General Superintendent-in a kaihruai a. Roreltute chu Pathian ruat an nih thu te, rorelnaa thlei bik an neih a thiang lo tih te leh rorelna chu Pathian ta a ni tih sawiin Bible a chhiar a. Hemi hnu hian tawngtai rualna hun hmanzui nghal a ni.