Academy of Integrated Christian Studies (AICS), Shekina Hill, Tanhril, Aizawl in Serampore College (University) Convocation ni 7 - 10 February 2013 chhunga a buatsaih mekah nizan khan Celebration Nite, Tribal Art Centre, Tanhrila neih a ni a, Chief Minister Pu Lal Thanhawla chu khuallian a ni.
Celebration Nite ah hian lawmna inkhawm anih angin mimal leh zaipawl zai te, hnam lam entirna te leh AICS chanchin video presentation hmangtea programme hi hman a ni a. Khuallian Pu Lal Thanhawla’n thuchah a sawiah kristian kohhran hrang hrangte inlungrualna pawimawh a tih ber thu a sawi a. Inlungrual tha hian Chanchin Tha kan hrilna kawnga min tichak theitu a ni a ti.
Chief Minister chuan Mizo te hi Serampore College chhawr ber pawl kan nih a rinawm a ni a ti a. Mizo te hi khawvela sakhaw lian ber ber pathum Buddhism, Islam leh Hinduism ten min karcheh tlat chung pawhin, thing bul lung bul be thin hnam kha A ram ti zau zel turin Pathianin Chanchin Tha hmangin min rawn zawng chhuak a. Tunah hian India ram hmun zau tak mai bakah khawvel ram hmun dang tam takah Missionary engemawzah kan tir chhuak mek a, a lawmawm tak meuh a ni a ti a. Chuvangin hmun kilkhawr takah awm mahila, Pathianin A Chanchin Tha hril tur hian min duh a ni tih a chiang hle a ni a ti.
Chief Minister chuan Serampore College atanga Graduate thar thahnem tak awmte chu hmun hrang hranga an kalna turah Pathian Malsawmna tam zawk an dawn theuh theihna turin duhsakna a hlan a ni.
Celebration Nite ah hian Rev Dr.K.Thangzaua, Convener in mikhualte leh kalkhawm mipuite lawmna thuchah a sawi a. AICS a zirlai ten recitation, lam leh zaihona te an hmang a. Lunglei leh Lawngtlai atanga zaipawl ten hla mawi tak tak an sa bawk a ni.
Serampore College (University) hian theology ah chauh degree a pe thei a. Degree zirna dang Arts, Science leh Commerce te chu University of Calcutta kaltlang chauhin a pe thei a ni.
Tarlan tawh angin Serampore College atanga Senators leh Board Member puipa lokal te hi Master Rt Rev Dr.John S.Sadananda, President Rt Rev Dr.Isaac Mar Philoxenos Episcopos, Registrar Rev Dr. Ravi Tiwari leh Secretary Prof Dr. Laltluangliana Khiangte an ni.
