India hmarchhak State dang te ruala naktuk March ni 13, 2014 a “Mega Mock-Drill” (Chhiatrupna thlen thulh a hmalak dan tur lemchan) Serchhip-a neih tur chungchang a inbuatsaihna leh chet lak dan tur te sawihovin vawiin chawhma dar 11:00 khan DC Meeting Room-ah District chhunga Sawrkar Department hrang hrang hotute, Tlawmngai Pawl aiawhte, Village Council hrang hrang aiawhte leh thu thar thehdarhtute an thukhawm a, Serchhip-a Mega Mock-Drill atan bika National Disaster Management Authority (NDMA) in Observer tura a ruat Dr. Jayakumar C, Senior Consultant, NDMA in a ho a ni.
Naktuk a Serchhip a Mega Mock-Drill neih tur hi Mizoram chhim lam District 4 - Lunglei, Serchhip, Lawngtlai leh Saiha District te tan a ni a, heng District hrang hrang atang te hian Observer leh Disaster Management lama nihna pawimawh nei mi engemaw zat an kal khawm dawn a ni. Mega Mock-Drill neihna tur atan hian Serchhip khawpui huam chhunga hmun hmun nga (Serchhip Bazar Building, J.N.Hospital, Sesah Residential Area, New Serchhip Supply Godown leh a chheh vel, DC Office Complex) thlan chhuah a ni a, heng hmun thlanchhuah te vil tu tur Incident Response Team leh an Commander tur theuh pawh ruat fel vek tawh a ni a, New Serchhip YMA Hall leh a chhehvelah Relief Camp siam ani ang a, Staging Area atan Leisekawt Field hman a ni bawk ang. Mega Mock-Drill a hman tur motor leh ambulance bakah hmanraw pawimawh zawng zawng te pawh ruahman fel vek a ni tawh bawk a ni.
Naktuka Mega Mock-Drill neih tur hi chawhma dar 11:30 ah tan a ni ang a, chawhnu dar 1:00 ah zawhfel vek a ni ang. Mock-Drill neih tan anih dawn hian khawpui chhung hmun hrang hrangah ‘Siren’ tih rik a nih dawn avangin mipuite chu chi-ai lo turin District Bawrhsap Pi Juhi Mukherjee, IAS chuan a ngen a; Mega Mock-Drill ngaipawimawh a thlawp tha tura mipuite a ngen bakah uar taka puangzar turin thuthar thehdarhtute a chah bawk a ni.
Mega Mock-Drill neih hunah hian National Disaster Management Authority, State Disaster Management Authority leh District hrang hrang atang Observer 18 an tel bakah National Disaster Response Team te, State Disaster Response Team te, Mizoram Police, 14 Assam Rifles, Sawrkar Department hrang hrang bakah Volunteers 100 chuang an tel dawn a ni.
National Disaster Management Authority ruahman naktuka Mega Mock-Drill neih tur hi India ram hmarchhak huap a ni a, chhawng hnih ah then niin Chhawng khatna chu March ni 10, 2014 khan Itanagar leh Ziro (Arunachal Pradesh), Guwahati leh Jorhat (Assam), Shillong leh Tura (Meghalaya), Gangtok leh Mangan (Sikkim) ah te hlawhtling taka neih a lo ni tawh a, a chhawng hnihna naktuk March ni 13. 2014 a neih turah Mizoram tel ve in Serchhip leh Aizawl ah buatsaih a ni ang a, hemi rual hian Silchar (Assam), Dimapur leh Kohima (Nagaland), Imphal leh Thoubal (Manipur) bakah Agartala leh Ambassa (Tripura) ah te neih a ni bawk ang.
