309/2026-2027

Dated Serchhip, the 28th April 2026: May 14 -15, 2026-a Serchhip DC tuala neih tur Hriselna Kutpui chungchang ngaihtuahin vawiin khan Serchhip District Bawrhsap Paul L. Khuma hovin, he Kut-a mawhphurhna changtu sawrkar department hrang hrang hotute leh khawtlang hruaitu pawl hrang hrang aiawhte DC Meeting hall-ah thukhawm.

Bawrhsap Paul L. Khuma chuan Hriselna Kutpui thil tum tlangpui sawiin Serchhip mipui, a bikin mi harsa zawk leh rethei zawkte, hmunpui panna tur nei lo leh Serchhip-a damdawi inentirna tur la awm ve rih lo natna hrang hrang neite’n Daktawr thiamte a thlawna an rawn theihna tur te, damdawi a thlawn emaw, man tlawm zawk emawa an hmuh theihna tur a nih thu te, emergency leh rikrum thil - tui tla, drug OD, electric man, stroke, heart attack leh thil dang eng eng emawahte, dam lo sawngbawl dan hriat lohna avanga nunna chhan theih ngei turte’n ho tea nunna an chan thinna thleng thinte tih tlem a nih theih nan, Basic First Aid Training leh hriselna kaihhnawih awareness hrang hrangte, he Hriselna Kutpui-ah hian neih a nih tur thu sawiin Serchhip-a Daktawr awm sate bakah Aizawl atangin natna hrang hranga thiam bik Daktawrte chahchhuah an nih tur thu a sawi a.

Ruihhlo avanga Mizoram thalai tam takte buaina tihziaawm a nih theih nan leh  ruihhlo that lohzia inzirtirna te, thalaite’n rilru dik an put theihna tura inzirtirna te he NMBA - Hriselna Kutpui-ah hian neih a nih tur thu sawiin, mi tam tak nunna chhanhima an awm phah ngei theih nan, Serchhip District  mipuite chu he Kut-ah hian lo kal theuh turin a sawm a; chanvo neitute pawh rawngbawlna rilru pua theihtawp chhuahpui turin a sawm nghal bawk a ni.

Vawiin thutkhawmah hian Serchhip District  Superintendent of Police Gavit Gogna, IPS pawh telin, mipuite’n hlawk taka an lo hman ngei a duh thu a sawi a; SDC Pi Lalchhanhimi hnen atangin hma lak dan tlangpui report ngaihthlak a nih hnuin, hlawhtling taka NMBA - Hriselna Kutpui hi hman a nih theih dan tur hrang hrangte rel ho a ni.