MZP Sub Hqrs. Serchhipin kumin 2015 a Serchhip District chhunga  HSLC, HSSLC leh Undergraduate ti tha zualte chawimawina vawiina Serchhip DC conference halla a buatsaihah Chief Minister Pu Lal Thanhawla chuan a hmanpui.

Chief Minister chuan chawimawina hi a bul tanna chauh a ni a, takna leh tumruhna nen zira, hmantlak leh chhawrtlak ni tura tang mar reng turin a fuih a. Zirlaite tih hmasak ber tur chu Pathian hlauh leh nu leh pa te thuawih a ni tiin, aia upate zah thiam turin a chah bawk a. Tum mumal neiloa lehkha zir hian thui min thlen thei lova, chuvangin takna ngaipawimawh hle turin zirlaite chu a chah a. Kan hlawhtlinna pass percentage te hi sang viaua kan hriat laiin, phai Delhi ahte chuan a sang lemlo a ni tih kan hriat a tha a ti.

Chief Minister chuan vawiin hi UNO in ‘World Youth Skilled Day’ ah a puan thu sawiin, Prime Minister Narendra Modi pawhin thalaite a ngaihpawimawh a, vawiin ngeiah pawh thalaiten thiam thil an zirna tur National Policy for Skill Development & Entrepreneurship leh National Skilled Development Mission a tlangzarh a ni a ti a. Thalaite tan hamthatna tur leh chhawr tangkai an nih theihna turin awlsam zawka loante pawh an lak theihna turte a buatsaih a ni a ti. Pu Hawla chuan graduate ni si, sorkara in ziak tling zo silo, kuthnathawh hmusit tawh laklawh si Mizo thalaite zingah an tam a ni tiin, kuthnathawh hi khawvela hna zahawm ber a ni a ti a. Intodelh turin hna zahthlak a awmlo a ti. Chuvangin kan ngaihtuahna kan siam thar a tul hle a ni a ti. Mizoramah pawl hrang hrang tam tak a awm thu sawiin, Chief Minister chuan heng pawl tam zawkte hi sorkar dodal pawl an nih loh pawhin, sorkara innghat an ni a ti a. Heng pawlte hian thatna an nei em tih min ngaihtuah tir thin a ni a ti.

Chief Minister tawiawmtu Pu H.Rohluna, Minister for School Education chuan chawimawina hi zirlaite tan fuihna a ni a ti a. Zirlaite entawn turin HSLC leh HSSLC a topper te tan ‘Chief Minister Award’ pawh siam a nih thu a sawi a. Chhawrtlak leh hmantlak ni turin tih tak takna a tul a ni tiin, thil dang nen kalpah chi a nilo a ti. Minister chuan Serchhipah Education Complex Cheng nuai 120 senna tur siam tum mek a nih thu a sawi a. Primary leh Middle School Aided te tan kumtin grant pek thin anih thu leh Govt Primary leh Middle School te tan ‘maintainance grant’ pek thin an nih thu a sawi a. He ‘maintainance grant’ hi a hman lohna tura hman anih chuan hrem theih an ni a ti.

Zirlai ti tha zual chawimawite hi HSLC a Distinction a passed zirlai 13, HSSLC a 1st Division a passed 17 te leh BA/BSc a 1st Divisiona passed 21 te hnenah chawimawina thuziak, citation hlan an ni a. HSLC leh HSSLC a 100% passed School te hnenah chawimawina thilpek hlan a ni bawk.

Chawimawina inkhawm hi MZP Sub Hqrs, Serchhip President T.Biakchamliana’n kaihruaiin, Chief Minister remchan hun an nghah avanga tlai tawh taka chawimawina hun hi buatsaih a nih thu a sawi.

Chief Minister hi a nupui Pi Lal Riliani bakah Pu Joseph Lalhimpuia, Parliamentary Secretary leh Pu T.Sangkunga, MLA & Chairman, Mizoram Youth Commission ten n tawiawm bawk a ni.