Serchhip District Election Officer Pi Juhi Mukherjee, IAS kaihhruaina hnuaiah vawiin tlai dar 4 :30 khan Serchhip DC Office ah Serchhip District chhunga Polling Station hrang hranga duty tur te computer hmanga thlanchhuahna “1st –Level Randomisation of Polling Party” neih a ni.

Election Commission of India in Polling Station tinah polling personnel pali zel awm tura ruahmanna a siam angin Serchhip District chhunga Assembly Constituency pathum (26-Serchhip, 27-Tuikum, 28-Hrangturzo) a polling station 77 a duty tur thlan chhuah an ni a, hemi atan hian Serchhip District chhung hmun hrang hrang atanga mi 556 hming lakkhawm atangin thlei bik awm lovin Computer hmangin mi 376 (308+68 reserves) thlanchhuah an ni a; thlanchhuahte tan hian a rang thei ang berin Training buatsaih a ni ang.

Randomisation of Polling Party hi chhawng thum a neih tur a ni a, 2nd –Level Randomisation of Polling Party neih anih hunah chuan Polling personnel te awmna tur Group siam a ni ang a, 3rd –Level Randomisation of Polling Party neih anih hunah Group hrang hrang te duty na tur polling station thlan chhuah a ni ang.

Randomisation hi Computer hmanga tih vek a ni dawn a, induhsakna leh inhriatthiamna bik awm lovin fair taka kalpui ani a, 2nd & 3rd Level Randomisation of Polling Party neih anih hunah hian a endik turin Political Party aiawhte pawh sawm an ni ang.

Vawiin a 1st –Level Randomisation of Polling Party neihna ah hian Serchhip District Election Officer, Pi Juhi Mukherjee, IAS, Pu Lalsangliana, MCS, Addl. DC Serchhip, Pu Ngulsangvela, MCS, SDO(C) North Vanlaiphai leh Pu Lalruatmawia Zadeng, DIO Serchhip te an tel a ni.