Chief Minister Pu Lal Thanhawla’n inkalpawhna kawngpui siam tura a hmalakna kal zelah vawiin tlai khan Washington base World Bank official Pi Diep Nguyen Van Houtte, Senior Operations Officer, Trade & Transport Facilitation, South Asia Region leh New Delhi base World Bank Representative Pu Ashok Kumar te chuan Chief Minister hi a chenna bungalowah hmuin, Mizoram leh a thenawm ram Bangladesh leh Myanmar te nena inkalpawhna tur motor kawngpui World Bank sum puihna atanga siam tur, Mizoram State Road Project Phase II (MSRP-II) chungchang an sawipui.

World Bank sum hmanga MSRP-II siam tur hi group hnihah then a ni a. Group I kawngpui hi siam hmasak a ni dawn a, he kawngpuiah hian Champhai - Zokhawthar Road (28 kms), Lunglei - Tlabung - Kawrpuichhuah Road (112 kms) leh Chhumkhum - Chawngte (45 kms) a tel a. Group II kawngpuiah hian NH 44A - Buarpui (82 kms), Buarpui - Thenhlum - Zawlpui (95 kms) leh Chawngte - Multi Modal Project Road (76 kms) a huam bawk a ni.

Inkawmnaah hian Chief Minister Pu Lal Thanhawla hi Pu Lalram Thanga, Principal Secretary, PWD, Pu Lianchungnunga, Engineer in Chief, PWD leh PWD official dang ten an tawiawm a ni.