617/2026-2027

Dated Serchhip, the 20th May 2026: Vawiin khan Bana Kaih (Phase-II) hnuaia Chief Minister's Special Package Grant semna leh Progress Partners-te kalphung inhrilhhriatna hun DC Pisapui Hall-ah hman a ni a. Serchhip District Bawrhsap leh District Level Monitoring Committee Chairman ni bawk Pu Paul L. Khuma’n Khuallian niin hun a hmanpui a, DLMC Member Secretary, SDO (Sadar) Pi Rebecca Laldinmawii Hrahsel chuan vawiin hun hi a kaihruai a ni.

Bawrhsap Pu Paul L. Khuma chuan Progress Partners kalkhawmte chu hmasawnna duhawm tak neia, ‘Success Story’ tha tak tak neih tum theuh turin a fuih a. Department hotute pawh theih tawp chhuah tur leh an Progress Partners theuhte thahnemngaihpui tura chahin duhsakna a hlan bawk.

Vawiin hun hmannaah hian DLMC Member Secretary Pi Rebecca Laldinmawii Hrahsel hnen atangin report ngaihthlak a ni a. Sub-Deputy Commissioner Pu Chawngthu Lalrinhlua’n Bana Kaih Phase-II chungchang sawizauna a nei bawk a; Concerned Departments hotuten thusawina hun hmang bawkin, DIPR Serchhip lamin Serchhip District-a Bana Kaih hlawhtlinpuitute Success Story an chhuah bawk a ni.

Tun dinhmunah Serchhip District chu Mizorama Progress Partners ngah ber dawttu niin, Aizawl District dawttu an ni mek a. Phase-I ah Progress Partners 135 neiin, Phase-II ah hian mi 49 an awm mek. Commerce & Industry Department hnuaiah mi 29 awmin an tam ber a, Agriculture Department hnuaiah mi 12, Fisheries Department hnuaiah mi 3, Animal Husbandry & Veterinary Department hnuaiah mi 2 awmin, Soil & Water Conservation Department, Urban Development & Poverty Alleviation (UD&PA) Department leh Social Welfare Department hnuaiahte mi 1 theuh an awm a; Direct Benefit Transfer system hmangin CM Special Package Grant-te hi anmahni Bank Account-ah theuh thunsak an ni dawn a ni.