No.3079/2021-2022
Dated Aizawl the 22nd November, 2021: Vawiin khan AH & Vety Department Training Hall Serchhip-ah Bawng lian vulhtute tan Bawngin tha taka no paia, tha taka a hrin theih dan tur zir hona, ‘Fertility Camp’ buatsaih a ni.

He hun kaihruaitu Dr. R. Lalmakthanga, DVO Serchhip chuan tun dinhmunah an huam chhungah Bawng lian vulh lai 332 a awm thu leh heng zinga 100 te chu Serchhip ami niin Baktawng leh Buhkangkawn-ah 88, Thenzawl-ah 43, Chhingchhip-ah 33, East Lungdar-ah 24, Khawlailung-ah 14, Bungtlang-ah 10, North Vanlaiphai-ah 8 a awm bakah an enkawl huam chhung Hnahthial District-a Thingsai khuaah 12 a awm mek thu a sawi a. Bawng lian hetiang zat hi awm mek mah se hnute sawr lai erawh an tlem hle tih a sawi a. Bawngten hnute tam zawk an neih theih nan vawiina training hi a pawimawh thu sawiin hmalak dang pawh kalpui chhoh zel a nih tur thu a sawi a ni. Kumin chhungin Serchhip district ah Bawngpui 59 kahrai ni tawhin Bawng no piang 15 a awm tawh thu a sawi bawk.

He training ah hian Serchhip leh Thenzawl atangin Bawng vulhtu mi 12 leh AI Workers te tel tura koh niin Dr. H. Vanlalrawna, Veterinary Officer, Serchhip leh Dr. Lalmuanpuia Samte, Veterinary Officer, Thenzawl chuan zirtirna an pe a, Bawnglian vulhtute tana hriat tur pawimawh hrang hrang zirtirin Bawnghnute sawrna atana an hman tur Bucket an pe nghal a ni. Chawhnu lamah Zawlpui phai-a K. Lalhmingmawia Dairy Farm-ah hun hman zui a ni bawk.

Attachment

  • Loading attachment...