No.3078/2021-2022
Aizawl, the 22nd November, 2021: Vawiin chawhma dar 11:00 khan Mizoram Youth Commission (MYC) leh Core Team on Skill Development, Khawzawl District tangkawpin an buatsaih vawk vulh chungchang inzirtirna, Piggery Farming Training chu KVK Training Hall, Khawzawlah hawn a ni a. He hun hi Pu C.C. Lalchhuangkima, Deputy Commissioner, Khawzawl District chuan khuallian niin a hmanpui.

Training hawnna programme, Pu H. Lalramenga, SDC kaihhruaiah Khawzawl District Bawrhsap chuan thu sawiin, ram hmasawnna ruala ke pen ve thei tur leh chhawr tangkai thei tur chuan mahni lo insiamrem a ngai a. Diltu engemawzat zing atanga thlan an nih angin, rilru inhawng leh thiam tum tak chunga tihtakzeta training turin vawk vulh training tura kalkhawmte a chah a. Training chungchangah hriatthiam loh leh harsatna an neih chuan inthlahrung hauh lo a trainer-te zawt thin turin a chah bawk.

Khawzawl DC chuan sawi chhunzawmin, Khawzawl District chuan nasa takin African Swine Fever hrileng tuar mah se, tun dinhmunah hrilengin ziaawm lam a pan tawh avangin vawk vulhtute tan pawh hmabak a êng chho leh tawh tih a sawi a. Mahni intodelh mai piahlamah hmun dang, District chhung leh pawn thlenga vawk, vawksa leh vawksa atanga thil siamchhuahte thawnchhuak thei tura tan la turin a fuih a ni.

Piggery Farming Training hi Mizoram Youth Commission hnuaia 'Livelihood Generation for returned migrant workers due to Covid-19 in the state of Mizoram' programme kaltlangin buatsaih niin, sum hi North Eastern Council (NEC) atanga dawn a ni. Khawzawl District-ah hian Core Team on Skill Development leh AH&Vety Department hmalaknaa training ruahman niin, training tur hian mi 20 thlanchhuah an ni a. Training hun chhung hi November ni 22 atanga December ni 8 chhung a ni ang.

Training hawnna hunah hian Dr. Malsawmkimi, Subject Matter Specialist, KVK Khawzawlin kalkhawmte lawmna thu a sawi a. Master trainer tura ruat Dr. Philip Lawmsangzuala, Veterinary Officer, AH&Vety Department, Khawzawlin training chungchanga hriattur pawimawhte tarlangin, Pu K. Lalremruata, LDC, DC Office in lawmthu sawiin hun a khar a ni.