Serchhip District-a Sawrkar Laipuiin thingtlang hmasawnna tur leh mirethei te dawm kanna tur atana ruahmanna a siam chi hrang hrang mipuite hrilhhriatna hun  ni thum awh tur Bharat Nirman Public Information Campaign neih mek chu vawiin nileng khan  New Serchhip YMA Hall-ah neih chhunzawm a ni a, vawiinah chuan Pu Lalramliana Sailo, President, Joint Village Counil, Serchhip chu khuallian atan hman a ni.

Vawiin a khuallian Pu Lalramliana Sailo chuan Sawrkar Laipuiin mipuite hmasawnna tur atana tha leh zung, sum leh pai senga theihtawp a chhuahna hian rah a chhuah tan mek a ni a ti a, abik takin heng Central Sawrkar scheme hrang hrang Serchhip District-a kalpui tu Sawrkar Department hrang hrang Head of Office te chungah lawmthu sawiin, an taihmakna leh an thahnemngaihna chu chhuanawm a tih thu leh sawiselna tur awma a hriat loh thu a sawi a, mipui aiawhte nena thawhhona boruak nuam tak an nei thin chu thil tangkai tak leh District chhung hmasawnna tur atana rahbi pawimawh tak pakhat ni a a hriat thu a sawi bawk.

Vawiina Bharat Nirman Campaign PIC neihna ah hian Serchhip khawchhunga VC member te, mipui te, Zirlaite leh Official te bakah thuthar lakhawmtu te an kal tha hle a, Stall 15 siam niin hengah te hian Department hrang hrang ten an hmalakna an pho chhuak a, vawiinah vek hian Satellite Venue Khawlailungah NRHM kaltlangin Health Camp neih a ni a, Disaster Management Campaign neih a ni bawk.

Bharat Nirman Public Information Campaign (PIC)  inkhawm vawiina neih hi Pu Andrew H. Lalremruata, MIS, DIPRO, Serchhip in a kaihruai a, PIC Core Committee Chairman Pu Mangjangam Touthang, IIS chuan PIC buatsaih anih chhan leh buatsaih dan kalphungte sawifiahna hun a hmang a, zaithiam hrang hrang zaiin I&B Ministry hnuaia Song and Drama Division ten hnam lam an entir a, Pu C.Lalsawmliana, Nodal Officer, PIC, Mizoramin lawmthusawiin hun a khar a ni.

Naktuk September ni 13 hian Bharat Nirman PIC hi khar a ni ang a, he kharna hun hi Pu Lalsawta, Education Minister in a hmanpui ang.

Chawhnu lamah mipuite hnena sawrkar hmalakna hrilfiahna hun “Technical Session" hman a ni a, hei hi MJA Serchhip District member ten kaihhruaiin Technical Session hi hun hnih ah then a ni a, hunkhatna hi Pu Zonunsanga Kawlni, General Secretary, MJASerchhip in a kaihruaia he hunah hian Rural Housing (IAY) Rural Electrification (RGGVY), Rural Road Connectivity (PMGSY), DRDA hnuaia Rural Development Programme hrang hrang, Empowerment of Weaker Sections, Equal Opportunities for Minorities etc., chungchangte zirho niin; Technical Session hunhnihna Pu PC Vanlalhruaia, DDK Stringer kaihhruaiah hian Integrated Child Development Scheme (ICDS), Rural Irrigation (AIBP) Rural Drinking Water/ Total Sanitation Campaign (ARWSP/TSC), Mizoram Tobacco Control Society (MTCS) etc. chungchang zirho a ni bawk. Technical Session ah hian topic hrang hrang te hi a concerned Department official ten an sawifiah a, mipuiten an hriat duh an zawh te chu an chhan sak thin a ni.

Attachment

  • Loading attachment...