Election Commission of India ruahmanna pakhat Electoral Roll dik, felfai leh thianghlim neih a nih zel theih na tura beihpui thlakna "National Electoral Purification Programme" chungchangah Serchhip District a Booth Level Officer te tan vawiin chhun dar 11:30 khan DC Meeting Serchhip ah Training pek an ni.
He Training hi Pu R. Vanrengpuia, SDO (Sadar) & Election Officer in a kaihruaia, District Election Officer, Bawrhsap ni bawk Dr. Lalrozama, IAS chuan he hun hi hmanpuiin BLO te chu election duty an neih ngai pawimawh turin a chah a. DEO chuan Election Commission in ruahmanna a siam angin NERP kalpui mek a ni a, hemi tihhlawhtlinna kawngah BLO te chuan mawhphurhna lian tak an nei a, Electoral Roll felfai neih a nih theih nana tihtur awm te chu chhuanlam siam lova tihlawhtling zel turin a chah a. Electoral Roll dik leh felfai nei tura hma an lo lak tawhna ah Serchhip District a BLO te a fak a, BLO te chu a bulthuma hna pawimawh tak thawktu, an fimkhur leh fimkhur loh azira ram leh hnam nghawng vek thei mawhphurhna keng an ni tih inhre nawn fo tura chahin, Electoral Roll dik leh felfai neih anih theihna tura theihtawp chhuah chhunzawm turin a ngen a ni.
Vawiin Booth Level Officers te tana National Electoral Roll Purification (NERP)Trainingah hian District Level Master Trainer (DLMT) pahnih Pu R Vanrengpuia, MCS, Election Officer leh Pu Vanlalrova , MCS, BDO Serchhip ten BLO kalkhawmte chu Electoral Roll thianghlim leh felfai nei tura hna an thawhna kawnga pawimawh chi hrang hrang te Power Point Presentation hmangin an zirtir a, chawhnu lamah zawhna leh chhanna hun hawn niin sawihona hun an hmang bawk a ni.
