Vawiin chawhma dar 11:00 am khan BNRGSK Hall Serchhip ah Central YMA, Labour & Employment & Industrial Institute Building & Other Construction leh Serchhip Sub Headquarters YMA tangkawp ten an buatsaih, thla khat awh tur Cement Mistiri Training hawnna inkhawm neih a ni a, Bawrhsap Dr. Lalrozama IAS chu khuallian niin in a hawng.

Hawnna inkhawmah Dr. Lalrozama IAS chuan, Vawiinah hian kan chenpui hnam dang unauten an taihmakna leh remhriatna hmangin in sak leh a kaihhnawih hna thawhnaah min hliah khuh nasa ta viau mai a. Kawng thenkhatah thatpui mahila, keimahni thawh ve theih reng hna a nih avangin heng hnate thawk tlak leh thawk thei, chhawr tlak Mistiri Mizofa ngei kan mamawh nasa hle tihna ani. Central YMA, LE&IT Building & Others Constructions leh Serchhip Sub-Hqrs YMA tang kawpten Cement Mistiri Training an buatsaih thei hi a lawmawm tak zeta, heta zirchhuakte ngei hi mipuite pawhin chhawr nachang hria ila kan ram sum leh pai tam tak kan humhim dawn tihna a ni, a ti a. Mistiri Training tura thlante chu Pathian malsawm tlaka hna thawka, hnam dangte aia thlan nahawm zawk Mistiri nih tum theuh turin a ngen a ni.

Training hawnna inkhawm rawn hmanpuitu Pu Vanlalruata, Vice President, Central YMA pawhin thusawiin, Mizo tlangval Cement Mistiri hna zir turte chu hnam dangte thiamna leh theihna hnehtu tur, ram leh hnam humhalhna kawnga tha pawimawh tak thawhtu tur an ni tih inhre turin a chah a, mipuite chhawr chak nih tum tlat turin a ngen a ni.

He Training hi thla khat chhung awh tura duan a ni a, a tel tur hian Serchhip Sub-Headquarters huam chhunga Group YMA pathum; Tuichangral ‘S’ group atangin mi 13, Tawi Group YMA atanginmi 4 leh Vantawng Group YMA atang mi 1 te bakah Serchhip leh Serchhip khaw chheh vela Branch YMA atangin mi 82, an vaiin mi 100 an kal khawm a, zirlaite hnenah hian DA Rs 150 leh chhun thingpui inna tur nitin Rs 20 pek an nih dawn bakah training zawha an hna thawh zuina tur hmanrua pek an ni bawk ang.

Vawiina a hawnna inkhawm hi Pu C. Lalramliana, Chairman Education & Youth Affair committee, Sub-Hqrs YMA Serchhip in a kaihruai a ni.