Serchhip Sub- Headquarters YMA bultumin vawiin nileng khan Serchhip Field No. II ah Chapchar Kut ropui taka hman a ni a, Kut Pa atan Serchhip District Bawrhsap Pu P.Lalchhuanga hman niin, Kut Nu atan Bawrhsap thiannu Pi Laltlanthangi hman a ni.

Chapchar Kut lawmna programme hi chawhma dar 11:00 ah tan niin Kut Pa leh Kut Nu ten Chapchar Kut lawmna hmun an thlen veleh Serchhip Sub-Hqrs YMA Cultural Troupe ten Khuallama lo lawmin an thutna tur hmun lamah an hruai a, Programme benglut tak tak leh mit ti tlai tak tak nen hun hman a ni.

Chapchar Kut lawmna hi Hun hnih ah then a ni a, Hun khatna hi Kut hawnna inkhawm ah hman niin - Pu Vanlalhluna, Vice-Chairman, Chapchar Kut Organising Committee- in a kaihruai a, Pu Lalzuiliana, President, Sub-Hqrs YMA, Serchhip-in Kut Chibai Bukna thu sawiin, Sub-Hqrs YMA Zaipawl zai ngaihthlak anih hnuah Kut Pa, District Bawrhsap ni bawk Pu P.Lalchhuanga’n Kut thuchah a sawi a, hemi hnu hian Nl. R.Laithangpuiin Zo hla sa in mipuite a awi a ni.

Kut Pa chuan Kut thuchah sawiin Mizote hi hnam ziarang leh kalphung ngainatawm tak nei kan nih avangin pawn lam mite pawhin kan zinga tel hi nuam an ti a ni a ti a, khawvel thiamna sang chho zelah kan hnam kalphung leh ziarang te chawinung zel tura tan lak a ngai a ni a ti a, mahni hnam culture hmusit reng reng hnam dingchhuak an awm ngailo ani tih sawiin kan nihna ze bulpui hi chhuang takin khawvel ngaihsan turin i chawinung zel ang u tiin mipui kalkhawmte a chah a ni. Hei bakah hian pi leh pute huna Chapchar Kut an lo hman thin dan ngaihnawm tak mipuite hnenah a sawi bawk a ni. Kut Pa hian Sub-Hqrs YMA hnenah hian Kut lawmnan tangkafai Rs. 2,000/- a hlan bawk.

Chapchar Kut lawmna Hun then hnihna hi Cultural Programme atana hman niin Pu R.Sanghmingthanga leh Nl. Lalduhlaii ten hneh takin an kaihruai a, MUP Sub-Hqrs ten Hla Do hmanga bul tanin, Sub-Hqrs YMA Cultural Troupe ten Chheih Zai leh Lam hmuhnawm takin an chhunzawm a, Serchhip P&E Veng Branch YMA, SSA Cultural Academy, Mizoram Youth Club Serchhip Branch leh MCO Sub-Hqrs Serchhip ten arualin sarlamkai an entir bawk a, Serchhip Chanmari Branch YMA in Chawnglaizawn an entir bawk a, Serchhip Hmar Veng Branch YMA leh Sub-Hqrs YMA Cultural Troupe ten Cheraw, Hriangtlang Branch YMA in Sarlamkai leh Chawnglaizawn, Chhiahtlang Kawn Veng Branch YMA in Zonunpar Cheraw entirin, Sub-Hqrs YMA Cultural Troupe in Mizo Upa Hla leh Lam an entir a, Serchhip Kawnpui South Branch YMA in Thingluang leidawh a Hmanlai Mizo pasaltha te insual dan an entir chuan mipuite lawm a hlawh zual hle bawk a ni. Hei bakah hian Serchhip Town Area a YMA Branch hrang hrang ten Cheraw a huhovin an kan bawk a, Dinthar Branch YMA in Chai lam an entir bawk. Hei bakah hian mimal zaithiam ten zaiin mipui an awi reng bawk a ni.

Kum dang ang bawkin kumin hian Chapchar Kut Miss thlan a ni a, Nl. Baby Lalngaihsaki d/o L.T.Muana Khiangte, Serchhip P&E Veng YMA Branch ami chu Chapchar Kut Miss 2012 atana thlan niin tangkafai Rs. 1,000/- hlan nghal a ni bawk.

Chapchar Kut Organising Committee te hian Chapchar Kut lawmna a chanvo nei YMA Branch hrang hrang leh pawl hrang hrangte hnenah lawmman a sem vek bawk a ni.