National Disaster Management Authority, New Delhi, Disaster Management & Rehabilitation Department, Government of Mizoram leh Deputy Commissioner, Serchhip District tangkawp ten an buatsaih Serchhip District huap Chhiatrupna lo thleng thei laka in ven dan tur zirhona "Workshop on Disaster Management" chu vawiin nileng khan DC Conference Hall, Serchhip-ah neih a ni.

Workshop hawnna inkhawma thusawitu District Bawrhsap Pu H.Darzika chuan chhiatna lo thleng tur hi sawi lawk theih anih loh avangin a hmachhawn dan ka thiam a tul a ni a ti a, Mizoramah chuan kangmei leh leimin bakah motor accident te hi kan tawh nasat ber a ni a, lirnghin nasat duh berna hmun a awm kan ni chungin tun thlenga ramdangte tawh ang kan la tawk lo hi kan vannei a ni tiin inthlahdah phah nana hman chi anih lo thu a sawi thung a ni.

Bawrhsap chuan kalkhawmte chu an thil zir turah uluk tura chahin a kaw tawpa awm huna harsatna hmachhawn dan te, mipui mangang thlabarte thlamuanpui theih tura hmalak dan turte pawh awmze nei taka thiam tum turin a chah a, YMA leh tlawmngai pawl hrang hrangte pawhin an thawh tur chin leh tih tur chin mumal taka an hriat theih nan ngaihtuahna seng tam turin a chah bawk a, chhiatna a lo thlenin mizo leh mizo lo pawh tumah inensan chi anih loh thu sawiin, khaw hrang hrang atanga workshop chhimtute chu an khua a an kir leh huna midangte zirtir leh chhawng thei tura inbuatsaih turin a chah nghal bawk a ni.

Workshop hi Pu Lalzuiliana, President, Sub-Headquarters YMA, Serchhip-in a kaihruaia, session hnih ah then niin session khatna ah Resource person pathumin topic thum insemin zirtirna an pe a, session hnihna ah hian Resource person pahnihin topic hnih an insem thung a ni. Resource person te leh an topic te chu :

1) Lalnunpuii Sailo, O/W, DIC, MHIP, Serchhip - "Trauma Councelling"

2) Dr. Albert Lalhminghlua, Medical Officer, JNM Hospital, Serchhip - "First Aid Administration/Medical First Responder"

3) Thangngaizuala, SEC, Sub-Hqrs. YMA, Serchhip - "Search & Rescue Operation"

4) Lalrinawma, MPS, Addl. SP, Serchhip - "Mob Control / Maintenance o General Law & Order in the event of outbreak of Disaster"

5) Robert C.Lalhmangaiha, MCS, SDC, Serchhip - " NCCF/CRF Guidelines, 2009"

Workshop-ah hian Serchhip District chhunga khaw hrang hrang atangin VC aiawh leh YMA aiawhte bakah Serchhip khawchhunga tlawmngai pawl hrang hrang aiawhte, sawrkar hnathawkte an kal kim hle a ni.