Mizoram pum huap Chhumchhia leh miharsa zual te tanpuina tur atana ruahman, “Chief Minister’s NLUP Special Scheme” chu naktuk August ni 27, 2013 (Thawhlehni) hian Chief Minister Pu Lal Thanhawla’n Serchhip ah a bul tan nan a sem dawn a, hemi atana ruahmanna leh inpuahchah dan tur ngaihtuahin vawiin chawhma dar 11 khan Serchhip Bawrhsap Pi Juhi Mukherjee, IAS kaihruaina hnuaiah NLUP Line Department te leh District Level NLUP Implementing Committee member te Serchhip DC Meeting Room-ah an thukhawm.

Ruahman dan chuan “Chief Minister’s NLUP Special Scheme” kick-off programme hi naktuk August ni 27, 2013 (Thawhlehni) chawhma dar 10:30 ah Serchhip DC Conference Hall-ah neih a ni ang a, hetah hian Mizoram Chief Minister Pu Lal Thanhawla chu khuallian niin, ani hian Chief Minister’s NLUP Special Scheme beneficiary thlanchhuahte hnena tanpuina pek tur 1st Installment chu anmahni aiawhtu tur Village-Level Committee te hnenah a sem ang.

Chief Minister’s NLUP Special Scheme” hi mi harsa zual leh tanpui ngai, chhumchhiate hnenah an mamawh phuhru tur liau liau a duan a ni a, NLUP Project pangngai ang a ni lova, beneficiary thlanchhuahte hnenah hian Rs. 20,000/- theuh pek tur an ni a, hei erawh hi chu vawilehkhata pek tlak tur nilovin an mamawh hun leh an harsat zual changa pek tur an ni ang. Beneficiary te thlangchhuak tur Village Level Committee hi khawtinah din a ni a, Committee Chairman leh Secretary te hi khawtlanga mi hmingtha leh zahawm,mi rinkai, Politics a awn lam neilo an ni tur a ni a, Committee member ah YMA leh VC aiawhte ruat tel an ni bawk. Beneficiary te tanpuina tur sum hi Village Level Committee kutah a awm ang a, an niin Beneficiary te dinhmun azirin leh an mamawh dan azirin (damloh changa damdawi leina tur, naupang school fee etc.) an mamawh zat zelin an pe chhuak ang a, sum inpek dan leh kalpui dan hi langtlang (transparent) vek a tih a ni dawn a ni.

“Chief Minister’s NLUP Special Scheme” kick-off programme zawh anih hnu hian DC Office tualzawlah Chief Minister hian Industries Department hnuaia NLUP 2nd Phase beneficiaries Auto-Rickshaw thlang mi 20 hnenah an Auto Rickshaw tur a hlan nghal dawn bawk a ni.