Vawiin chawhnu dar 2:00 khan Serchhip IOC Veng YMA Library Hall ah naktuka MP inthlan leh Hrangturzo Assembly Constituency bye-election a vote tla te chhiar anih huna tel tur Political Party hrang hrang aiawh Counting Agents te tan training buatsaih a ni a,
Pu Lalhmansanga, MCS, Election Officer in Training hi hmanpuiin Master Trainer pahnih Pi B.Malsawmtluangi, MCS, SDC leh Pu Vanlalrova, MCS, BDO, Serchhip ten Counting Agents te hi Training an pe a ni. Pu Lalhmansanga chuan Counting Agents te hnenah thuchahin Inthlanna ah chuan a chak zawk leh chaklo zawk awm ngei ngei a ngai a, a chak zawk pawhin chakzawka awmdan an thiam a ngai a, chaklo zawk pawhin chakloh dan thiam a pawimawh ani a ti a, chakloh vanga puhmawh tur leh chhuanlam tur zawn chuk mai hi a puitlinlohthlak bakah mipui zahlohna ani tiin Inthlan buatsaih chungchangah Election Official te chuan Inthlan hmasa atang tawhin dan bawhchhiatna pakhatmah an neih loh thu a sawi bawk a, EVM Strong Room venhim anih dan te chiang takin a sawifiah nghal a ni.
EVM Strong Room hi April ni 12, 2014 zing dar 3:00 velah Polling Party hnuhnungberte thlen hnu ah tihdanphung pangngaiin Party/Candidate agents te leh Election Observer te hriatpuia kalh fel a seal thlap a ni a, Strong Room hi thuah thuma venhim niin a chhungril berah Central Armed Police Force ten an veng a, a dawt ah State Armed Police Force ten veng lehin a pawnlang berah District Executive Force ten an veng a; hei bakah hian EVM Strong Room kawngkharpui hi CCTV hmangin chunzan zawmin a thla lak a ni a; video footage dahthat vek ani bawk, Strong Room tlawh tute chhinchhiahna log book pawh mumal taka siam niin Strong Room tlawhtuten an tlawh Ni, Thla leh darkar engkim chipchiar taka chhinchhiah vek a ni bawk.
Serchhip District chhunga MP inthlan leh Hrangturzo Assembly Constituency bye-election a vote tla te chhiar na tur atan hian Counting Hall pahnih ruahman a ni a, Counting Hall No. 1 atan DC Conference Hall hman ani ang a, counting table 14 awmin heng zinga counting table 7 ah hian Hrangturzo bye-election a vote tla chhiar a ni ang a, counting table 7 dangah Hrangturzo Constituency a MP Election a vote tla chhiar a ni ang, MLA bye-election leh MP Election a vote tla te hi a ruala chhiar tur a ni ang. Counting Hall No. 2 atan DC Office-a Establishment Room hman ani ang a, hetah hian counting table 10 awmin Serchhip leh Tuikum Constituency a MP Election vote tla te chhiar ani dawn a, Serchhip Assembly Constituency a vote tla chhiar hmasak ani ang a, chhiar zawh anih veleh Tuikum Serchhip Assembly Constituency a vote tla chhiar chhunzawm a ni ang.
M.P. Election a Postal Ballot tla te chu M.P. Election a Returning Officer thuthmun Aizawlah chhiar tur ani ang a, Hrangturzo Assembly Constituency bye-election a Postal Ballot tla te chu Returning Officer Dr. Franklin Laltinkhuma kaihhruaina hnuaiah Counting Hall No. 1 ah chhiar a ni ang a, postal ballot chhiar tan anih atanga minute 30 a ral hnu ah EVM a vote tla te chhiar tan ani ang.
ECI thuchhuak angin naktuk zing dar 8:00 atang vote tla te hi chhiar tur a ni ang a, Counting agents te chu zing dar 7:30 ah Counting Hall a thufel hman tawh tura beisei an ni a, Counting Hall-ah meizuk phal anih loh bakah mobile phone kenluh phal ani dawn lova, duh hun huna Counting Hall chhuahsan phal anih dawnloh avangin zunram thiar tur pawhin RO/ARO phalna lakzel tur ani ang.
Master Trainers Pi B.Malsawmtluangi, MCS, SDC leh Pu Vanlalrova, MCS, BDO, Serchhip ten EVM vote tla chhiardan leh VVPAT chungchangah Counting Agents te hi training an pe a ni.
