Local Administration Department, Serchhip District buatsaihin vawiin chawhnu dar 1:00 khan Serchhip DC Conference Hall-ah “Digital India Week” kalpui mek bawhzui nan Serchhip District a Village Council member te pualin “Digital India” chungchang inhrilhfiahna hun hman a ni a, Serchhip District Bawrhsap mawhphurhna chelh mektu Pu V.L.Remliana, MCS chuan he hun hi khuallian niin a hmanpui a, mithiam sawmbik ten Village Council member kalkhawmte hnenah zirtirna an pe a ni.

Fuihna thusawitu khuallian Pu VL Remliana chuan khawtlang hruaitu kalkhawmte chu Computer thiam pawimawhzia hrilh in thil harsa lutuk anih loh thu leh huphurh en a en lova hnathawhna atana tangkai chin tal thiam tum turin a hrilh a, mizote hi thilo thar leh kalphung thar pawm mai harsat hnam kan nih bakah kan lo tih thin dan pangngai anga kal reng duh hnam kan nih avangin hei hian hma kan sawnna tur ah kawng tam takin min tithuanawp thin a ni a ti a, mi tihdan anih vanga ti ve tur kan nih loh thu leh kan tana tha tur anih vang chauh zawka ti ve tur kan nihna hi kan hriatchian a hun takzet tawh a, khawtlang hruaitute chu an khaw mipuite rilru sukthlek her rem sak theitu pawimawh ber an nih avangin hma an hruai ngam a, entawntlaka an inbuatsaih a ngai a ni tiin an thil zir tur te hrechiang turin a fuih a ni.

He hunah hian Pu Lalruatmawia, District Informatics Officer, Serchhip District-in Digital India Project chungchang sawifiahin India ramin chak leh zuala hma a sawn theihna tura Sawrkar Laipui hmalakna anih thu leh kum 2019 ral hma ngei a hlawhtlinpui a tum a ni a ti a, a hlawhtlinna atan pawh Rs vaibelchhe nuaih li a ruahman thu te, he hmalakna hnuaiah hian India rama thingtlang khua zawng zawng broadband internet connection hmanga thlunzawm tum anih thu te, mobile phone leh internet kaltlanga tangkai taka mitinin Sawrkar an dawr theihna tur a mobile leh internet signal chak tha tawk siam te, common service centre leh post office tihchangtlun te, e-governance kaltlanga mipuiten Sawrkar an dawrna kawnga rang tak leh chak taka thil tih fel fai zung zung anih theih dan tur te a sawifiah a, aadhar number erawh a pawimawh hle dawn thu leh Sawrkar dawrna kawng tinrengah aadhar number hman zel a ngaih dawn tawh thu a sawi bawk a ni. Heng bakah hian Sawrkar laka vuivaina nei tan pawh Office kalchilh kher lovin internet kaltlangin an thlen thei tawh ang a, Sawrkarin a bawhzui dan pawh internet kaltlangin an vil zui reng thei tawh dawn a, Sawrkar atanga hamthatna dawn theih chi reng reng pawh mahni thuthmun atang an en theih bakah an lo zirchiang thei vek tawh dawn bawk a ni.

Resource person dang Pu Lalhruaitluanga Sailo, e-District Manager, Serchhip District pawhin e-District kaltlanga hna an thawh dan te a sawifiah a; tunah hian DC Office dawr kher ngai lovin online in Income Certificate, Caste Certificate leh Residential Certificate te a tihfel theih tawh a, ILP erawh thawktu indaihlohna vangin an kalpui thei rih lo thung. Heng bakah hian hian Social Welfare Department hnuaia NSAP tanpuina leh Local Administration Department hnuaia Housing Loan dilna bakah hna dilna (Employment Service) te chu pawh e-district hnuaia Common Service Centre leh Rural Information Kiosk kaltlang hian a tihfel theih tawh bawk a, heng bakah hian service hrang hrang 19 dang pawh e-district kaltlanga tih theih tura hma lak mek ani bawk.

Vawiin inkhawm hi Pu ST Lalhmingmawia, DLAO in a kaihruai a; Serchhip khawpui huamchhunga Village Council member te leh Common Service Centre/Rural Information Kiosk dahna khua a Village Council hruaitute an kal tha hle a ni.