Vawiin hian Serchhip DC Conference Hall-ah State Disaster Audit Team ten, Serchhip District Disaster Plan leh Departmental Disaster Plan te endikna hun, Disaster Audit an buatsaih a. Chhiatrupna lo thleng palh laka inbuatsaih ruahmanna (Disaster Plan) tha zawk neih dan tur sawi ho a ni.

He hun ah hian Serchhip District Disaster Management Authority Chairman, Pi Sangchhin Chinzah chuan thusawiin,  khuarel chhiatna mai nilo, mihring siam chhiatna pawhin engtiklai pawhin min chim thut thei reng a. Chuvang chuan inbuatsaihna tha tak neih leh chung inbuatsaihna (Plan) kan siam te hriatchiana, mawhphurtu kan inruat ang ang te pawhin kan chanvo theuh te kan hriat bel a ngai em em a ni. Kan inbuatsaih that phawt chuan, keimahni leh kan chhehvela mite tan a hlu em em dawn a ni, a ti.

Audit Team leader, Pu Zosangzuala, MPS, Jt. Director DM&R pawhin thusawina hun neiin, inruahmanna tha nei sa chunga chhiatna hmachhawn leh inruahmanna tha nei sa lem lo chunga chhiatna hmachhawn tawh te dinhmun inthlauh zia, hun kal tawha India ram bung thenkhata thil thleng tawh te hmangin a sawifiah a. Disaster Plan siam laia ngaih pawimawh tur thil te, thawh hona pawimawhna leh chung thil pawimawh hrang hrangte chu District leh Department Disaster Plan siamna lamah kan bilh tel hlawm em? tih enchiang tura Disaster Audit nei an nih thu tarlangin Disaster Audit hi kum tin neih tura ruahman a nih thu a tarlang bawk.

He mi hnu hian Pi Vanlalduhi Ralte, Serchhip District Organiser chuan Serchhip District Disaster Plan, 2016 sawifiahna a nei a, Department thlan bik paruk ten an Department Plan theuh te sawifiahna an nei bawk a. Chung Plan hrang hrang te chu Audit team te hian a that tawk lohna lai te, siam belh ngai leh thil tul dang nia an hriat tein an sawi zuia, he huna kalkhawm te pawhin zawh duh an neih apiangte zawhfiahna hun an nei nghal bawk.

Vawiina Disaster Audit hi Pu Vabeimozachhi Chozah, Nodal Officer, DM&R chuan a kaihruai a, Serchhip a Department hrang hrang aiawh officer te leh sawm bik mi pawimawh te an tel a, Disaster Audit Team atangin an leader Pu Zosangzuala bakah Disaster lam mithiam leh DM&R officer dangte an rawn tel a ni.