Vawiin World Alzheimer’s Day pualin zing dar 6 AM khan Health Minister Pu Lal Thanzara hovin mi 500 chuangin “Memory Walk” neiin, Chanmari kawn atanga Millennium Centre thleng an kal a, Millennium Centre kawtah programme tawi buatsaih a ni bawk. India ram puma Alzheimer natna leh a anpui natna dangte ngawihventu pawl, Alzheimer and Related Disorders Society of India (ARDSI) Mizoram Chapter in he programme hi a buatsaih a ni a, kumin World Alzheimer’s Day atan thupui thlan chu “Remember Me” tih a ni.
Health Minister chuan Alzheimer’s Disease chu Mizorama kan hriat ngai loh tak, kan hriatchian loh avanga a natna veituten an mamawh ang ngaihsakna an lo dawn loh phah chu tunah mi thahnemgai leh mithiamte zarah kan hre lar tan ta a ni tiin, natna veituten ngaihsak leh duat an hlawh phah ngei a beisei thu a sawi a. Alzheimer natna chu thluak natna chi khat, zawi zawia hriatreng theihna leh finna leh ngaihtuanha tichhe tu, chhiat lam pan zel natna a nih avangin a tihdamna damdawi la awm rihlo mahse natna veitute duat chu a pawimawh hmasa hle a ni, Minister Pu Lal Thanzara chuan a ti.
He natna chungchangah hian a tihbuai mek leh a la tihbuai ve theih chhungkua leh mipui hnenah Health Minister chuan hriat tur pawimawh a ti hrang hrang sawiin, “natna hi kan chungah emaw kan chhungte chungah a lo thleng a nih pawhin vanduai bik inti a hrehawm ti ngawih ngawih lova midang an awm ve tih hre renga inhnem thin tur a ni” a ti a; he natna hi upa lama thleng tam ber a nih avangin a veite tan hmangaihna lanchhuahtirna hun remchangah hmanga ngaihsakna lantir tur te in a chah. Minister chuan Alzheimer natna hi thluak natna ni mahse thluak ber a chak tawh loh chuan taksa dang pawh a nghawng thin avangin natna veite enkawl uluk a pawimawh zual zia a a sawi a, rilru mang thenkhat hi chu enkawl dam theih a nih avangin a chhan dik tak hriat chhuah thuai a tul hle thu a sawi bawk.
Alzheimer natna hi Mizoramah chuan ‘thluak sawng natna’ ti tein hriat a ni a. ARDSI Mizoram Chapter hi September ni 21, 2015 khan din niin, he pawl hian phungbawm sawmin Alzheimer natna sawihona leh, natna vei enkawltute zirtrina seminar leh workshop te a lo buatsaih tawh thin a. Tun thla September ni 29 hian Chanmari YMA Hall-ah seminar a buatsaih leh dawn bawk a ni. ARDSI chuan Aizawl leh a chhehvel hi Zone hrang hrangah thenin MUP te nen Alzheimer’s disease veite chhinchhiah leh tlawh chhuah hna an thawk thin a, social media kaltlangin Mizoram pumah he natna vei chhungkuate inhriattawn leh intawiawmna a buatsaih bawk.
Vawiin programme buatsaih hi ARDSI Mizoram Chapter President Pu Vanneihtluanga’n a kaihruai a, member boral tawhte sunna hun hmang bawkin Memory Walk-a tel naupang ber (kum 3) leh upa ber (kum 85) hnenah Health Minister hian lawmman a hlan bawk .
ARDSI Mizoram Chapter-ah hian a duh tan membership fee Life Member Rs. 1000 emaw Annual Member Rs. 100 chawiin member ah a inpek theih a ni.
