Coimbatore-a Federation of Motor Sports Clubs of India(FMSCI) inelna lian ‘JK Tyre Red Bull Road-to-Rookie Cup’ leh ‘Suzuki Gixxer Cup’ zawhfel taka champion leh medal latute lawmpuina hun vawiin khan Mizoram State Sports Council Office, Upper Khatla-ah Pu Chalrosanga, MLA hovin hman a ni.

MIMSA rider hlawhtlingte lawmpuina hun Sports Medical Officer, MSSC Dr.Lalzarmawia kaihhruaiah Khuallian Pu Chalrosanga, MLA chuan Racing hi inelna hautak leh sum hrawm na tak a nih avangin Mizo thalaite tan harsatna tam tak suttlang a ngai dawn a, eizawnna tling khawpa an hlawhtlinpui a duhsak thu a sawi a. Sum leh pai an seng nasa a, a enkawltu Mizoram Motor Sports Association (MIMSA) tan pawh luhaina tham tling khawp a ni ang a, chuvangin inelnaa tel phate chuan tih takzetna leh tumruhna nen, hlawhtling ngei an tum tur a ni, a ti. Vawiina infiammite hi an vannei takzet a, hlawhtlin theihna tur hmunhma (infrustructure) tha leh hmanraw tha sawrkarin a hlui mawlh mawlh a, Mizoram tana medal la ngei turin infiammite min cholet tawh zawk a ni, a ti bawk. Mizo infiammiten Mizoram hming an titha em em a, India mai ni lo khawvel hriatah Mizote an phochhuak mek a; MiMSA rider-te trophy hraw tak tak nena lo haw chu an chhuanawm hle a ni tiin lawmpuina thu a sawi.

MIMSA President Pu Vanlalmuana pawhin thusawiin an rider ten intlansiakna tur hmun mumal pawh nei lova India ram champion an ni thei chu State dangte pawhin mak an tih ber a ni a ti a. Spain-a khawvel huap inelna lian zawk tlankawng an zawh thei tur chu an tan mellung pawimawh a nih thu a sawi. Football tihmasawn nana khelmual tha a awm angin MIMSA pawhin tlankawng tha chu nei ila, Mizo rider-te chu Mizoram leh India ti hmingthatu an nih thuai a beisei thu a sawi bawk. MSSC chuan a tih thin danin Mizoram team tan lawmpuina thilpek an hlan a, MIMSA pawhin MSSC hnenah ngaihhruina thilpek an hlan ve bawk.

Sept. 2-3, 2017 chhung khan Coimbatore tlankawng, Katari Speedway-ah ‘20th JK Tyre FMSCI National Racing Championship 2017’ tlan a ni a. ‘JK Tyre Redbull Road-to-Rookie Cup’ hi round 3-na zawhfel niin Lalhruaizela, Bawngkawn, Aizawl chu pakhatna a ni a, intlansiak vawi thum (round 3) awm atangin point 58 a hmu a. K.Lalnunsanga, Electric Veng, Aizawl chu pahnihna a ni a, round 3 intihsiak atangin point 44 a hmu ve thung.

‘Suzuki Gixxer Cup’-ah Malsawmdawngliana, Kanan Veng, Aizawl chuan Race 2-ah gold medal dawngin Race 1-ah silver medal a dawng a. Lalmawipuia, Bawngkawn, Aizawl chuan Race 1-ah bronze medal dawngin he intlansiakna hi a la zo lova, Buddh International Circuit, Greater Noida-ah intlansiak a la awm leh ang.