Vawiin chawhma khan DGP Pu Thianghlima Pachuau hovin a Office Chamber-ah State Steering Committee for National Emergency Response System an thukhawm. 

State Steering Committee  chuan  emergency chungchanga  mipuite phone call chhangtu turte awmna hmun  Public Safety Answering Point (PSAP) chu Aizawl SP Office chungzawlah sak turin a rel a. Committee hian National Emergency Response System kalpui hmasakna tura thlan Aizawl district, Lunglei district, Kolasib district leh  Champhai district-ahte Emergency Response-a hman turin  lirthei  Sumo 5 leh two wheeler 8 lei a rel bawk a. Heng motor lei turte hi Aizawl District tan Sumo 2, Lunglei, Kolasib leh Champhai district tan sumo 1 theuh leh District pali ah hian two wheeler 2 theuha sem nise tiin a rel bawk a. National Emergency Response System kalpui hmasakna tur district-te hi law & order case leh crime tam dan a zira thlan an ni.

DGP Pu Thianghlima Pachuau chuan sawrkar laipuiin mipui ten harsatna  hrang hrang an tawha awlsam  taka tanpuina an dawn theihna tur atan state tinah national emergency response system din vek tura a tih chu Mizoramah hma lak mek zel a nih thu a sawi a. Centre for Development of Advanced Computing (C-DAC) nen thawk hovin National Emergency Response System hi  technology changtlung tak hmangin Mizorama kalpui tura  hmalak mek a ni. 

National Emergency Response System hnuaiah hian emergency number 112 ah  tu pawhin harsatna engpawh:  kangmei, crime, accident, chhiatrupna, natna leh emergency dangte report vek theih tura ruahman a ni a, heta tang hian tanpuina tul ang  ang te a rang thei ang bera ngaihtuah sak an ni dawn a ni.

Meeting-ah hian Pu C. Laldina DIG (Training); Pu Joseph Lalchhuana DIG (NR); Pu Dingluaia Jt. Secretary Home Department; Pu Lalhuliana Fanai Director, Fire & Emergency Service; Pu PC Lallianthanga SP (wireless); Dr. Rob ert L. Khawlhring State Nodal Officer, Health & Family Welfare Department leh Disaster Management& Rehabilitation leh I&PR department aiawhte an tel bawk a ni.

 

Attachment

  • Loading attachment...