Vawiin nileng khan Serchhip District chhunga Village Council member thlan thar zawng zawngte tan Thirteenth Finance Commission chungchang a training chu DC Conference Hall, Serchhipah neih a ni a, District Local Administration Officer, Pu S.T. Lalhmingmawia’n he hun hi a kaihruai a ni.

TFC chungchanga training hi District chhunga khaw lian deuh deuh 5-ah neih a lo ni tawh a, tun hi a hnuhnung ber leh a kharna a ni a, Serchhip khawpui chhung leh a chheh vel khaw hnai zualte tana buatsaih a ni. He hunah hian VC te chu TFC chungchanga thil pawimawh, TFC nih phung te, a hna thawh theih leh thawh dan tur te bakah tangka vawn dan tur te nen uluk taka zirtir an ni.

Pu Hmingmawia DLAO chuan thu sawiin tunlaia hmasawnna leh ram kalphung lo inher danglam chho zelah hian, VC tam tak chu khawtlang inrelbawlna leh inawpna lama an mawhphurhna tam tak hnuchhawnin development lamah an inhmang ral lek lek tawh a ni a ti a, khaw tam takah rorel tura thlan VC te thuneihna tur pawh tlawmngai pawlte kutah a tluk luh mek thu sawiin, hemi avang hian VC te chu khawtlang inawpna kawnga an mawhphurhna hre thar leh turin a chah a ni.

VC te hi a len zawnga tehin category 5-ah then an ni a, kum 2011-2012 chhung hian VC lian ber group te tan TFC fund hi cheng 2,80,000/- leh a tlem berte tan Rs. 8,3000/- sem tura ruahman a ni. Tin kum 2010 – 2011 chhunga Village Council thawk tha 15 thlan chhuah te hnenah Performance Grant cheng 1,36,000/- theuh an sem dawn bawk a ni.