Local Administration Department, Serchhip buatsaihin DC Conference Hall, Serchhip ah vawiin nileng khan Serchhip District chhunga Village Council zawng zawngte tan Thirteenth Finance Commission Grant chungchang leh Village Council Act chungchang training neih a ni a, Serchhip District Bawrhsap Dr. Lalrozama, IAS chuan khuallian niin Training hi a hawng a ni.

Training hawnna thu sawitu Bawrhsap chuan Village Council hruaitu kalkhawmte chu Sawrkarin mipuite leh ram hmasawnna hna a thawhna kawngah a bulthuta awm, mipuite ngheng hnai ber tu leh kan dinhmun hrechiang ber tu an nih avangin an mawhphurhna a pawimawh hle a ni a ti a, hmasawnna hna thawhna tur sum pawh anmahni kaltlanga thawh a tam tham hle avangin fimkhur tak leh dik taka an thawh a pawimawh a, Village Council thlan thar anih hnu a hetiang training buatsaih hmasakna ber anih avangin Thirteenth Finance Commission chungchanga thil pawimawh, a nih phung te, a hnathawh theih leh thawh dan tur te, tangka vawn dan tur te bakah VC te mawhphurhna chi hrang hrang an zir tur te chu uluk taka rilru pe turin a chah a, mithiamte buatsaih lehkhabu leh paper an dawn avanga inthlahdah a In lama haw hunah ka chhiar mai ang tih hian zawm a harsat bakah hriatthiamloh te zawhfiah a rem tawh thin lova, chuvang chuan heng laka buaina an tawh loh nan dilchhut taka training awm tluan ngei turin a chah a, Village Council te chu tha taka thawhhopuiah sawmin an thawhhona a that chuan an Village Council huamchhungah hmasawnna nasa tak an thlen theih ngei a beisei thu sawiin duhsakna a hlan bawk ani.

Vawiin Training ah hian Serchhip District chhunga Village Council 49 atangin Village Council President, Secretary leh Treasurer theuh te koh khawm an ni a, Resource Person pathum awmin Pu F.Thasiama, Asst. Director (Audit), Account & Treasuries Department in 'Maintenance of Accounts & Audit' chungchang zirtirna a pe a, Pu ST Lalhmingmawia, DLAO, Serchhip hnen atang “Acts & Rules (under LAD) Governing VC” chungchang zirtirna dawn niin Pi Dorothy Muansangi, Asst. Director, LAD hnen atang ' Gram Sabha, Maintenance of Assets Register, Assets Mapping & IT Knowledge etc.' chungchang zirtirna ngaihthlak a ni bawk. Resource Person ten an chan theuh a zirtirna an pek zawh hian sawihona hun leh hriatthiamloh te inhrilhfiahna hun hman zel a ni.