Vawiin hian KVK Lawngtlai te chuan Lawngtlai bul Upper Saikah khua Serthlum chingtute chu, Upper Saikah khaw VCP Pu Joseph-a chenna inah serthlum natna vanga harsatna tawk mekte leh Vawk vulhtu, harsatna neite ko khawmin an harsatna sutkian dan tur zirtirna an nei.

KVK Lawngtlai Senior Scientist and Head Dr. Michelle C. Lallawmkimi kaihhruaiin vawiina loneitu kalkhawmte hi training buatsaih sak an ni a. Dr. Michelle C. Lallawmkimi chuan KVK chu Loneitute tana thawk, loneitute vanga awm a nih avangin loneituten an harsatna tawhte inthlahrung hauh lova an hrilh hre thin turin a ngen a. Hmun kil khawr ber berah te pawh loneitute mamawh dan a zir zelin kan kal thei zel a ni, a ti.

Serhuan neitute chu Plant Protection Scientist Pi Esther Zonunpuiin zirtirna a pe a, an thlaite venna tur damdawi chi thum a sem bawk. Chutiang bawkin Vety Scientist Dr. Lalthazuali Zadeng chuan Vawk vulhtute chu zirtirna a pe thung a. Vawk damdawi leh Vitamins te a sem ve bawk a ni.