Trade & Commerce Minister Pu H.Rohluna chuan vawiin chawhnu dar 1:15 khan Mission Veng Market building sakna tur lungphum a phum.

Minister Pu H.Rohluna chuan thu sawiin Mission Veng Development Society leh bialtu MLA Parliamentary Secretary Lt.Col.Z.S.Zuala te hmalakna leh thahnemngaihna azara Mission Veng Market building thar sak a ni thei tur chu lawmawm tiin an chungah lawmthu a sawi a. Aizawl khawpui chhim lama market pui ber tur, thenawm khua te pawhin an thlai tharte an hralhna hmunpui ber tur chu tha taka sak a nih theih nan veng mipui ten uluk taka vil turin a chah a. Mihring khawsakhonaa a pawimawh ber chu thianghlimna a ni tiin thianghlim loh chuan mihring hriselna a khawih avangin kan thil ei tur zawrhna hmun te pawh thianghlim taka kan enkawl a pawimawh tak zet a ni, a ti bawk. Trade & Commerce Department chuan Mizoram pumah market 200 chuang a enkawl mek thu sawiin Minister chuan tun financial year July thla thlengin sawrkar ah sum Rs 193 lakhs chuang an chhunluh tawh thu te a tarlang bawk.

Minister tawiawmtu Parliamentary Secretary Pu Joseph Lalhimpuia chuan Trade & Commerce Department chu department te tak te ni mah se mimal leh chhungkaw eizawnna siamsaktu lian ber, mipui rawngbawlna zau tak thawktu a ni, a ti a. Mission Veng Market sak tur atang chuan mi tam takin eizawnna an neih phah dawn a ni tiin faina leh thianghlimna kawnga midangte kawhhmuhtu ni turin a chah bawk.

Bialtu MLA Lt.Col.Z.S.Zuala, Parliamentary Secretary pawhin thusawiin Mission Veng Market dinna tura bul tumtu Mission Veng Development Society chungah lawmthu a sawi a. A changtu Minister, Department leh PWD hotute chungah lawmthu a sawi bawk. Market building sak chhoh turah uluk taka vil tlang turin khawtlang mipui kalkhawmte chu a sawm a, a tha lo lai te a awm chuan sawisela a tul anga bawhzui zel thin turin a chah bawk.

Mission Veng Market building sakna atan hian NEC atangin pawisa sanction zat chu Rs 5,98,41,000 /- a ni a, In chhawng 5-a sak tur niin kum 2 chhunga sak zawh hman tura ruahman a ni. A chhuat pumpui zau zawng chu 2255.70 sq.m. a ni.

Mission Veng Market building lungphum programme hi Trade & Commerce Director Dr C.Lalzirliana’n a kaihruai a, Pu Hrangthanga Zote, E.E., Project Division-I, PWD-in a sak dan tur technical report a pe bawk. Market lungphum programme ah hian Mission Veng khawtlang hruaitu thahnem tak an tel a ni.