Vawiin hian DC Conference Hall ah Serchhip District Development Co-Ordination & Monitoring Committee (DDCMC)/DISHA meeting, tun financial year a a hmasa ber chu buatsaih ani a. Chairman, Pu CL Ruala, MP Lok Sabha, Co- Chairman Pu Ronald Sapa Tlau, MP, Rajya Sabha leh MLA member Er. Lalrinawma, Tuikum Assembly Constituency ten an telpui.

District chhunga Central sawrkar sum hmanga hmasawnna hnathawh hrang hrang thlirlet thin tu Committee, DDCMC thutkhawmah hian Pu CL Ruala chuan, tun hnaiah Central atangin Monitor Team te lokalin District hrang hranga hnathawhte an enfiah thu a sawi a. Report kimchang la hmu lo mah se Team te hi an lungawi thawkhat nia a hriat thu sawiin, PMGSY hna kalpui thuah erawh chuan maintenance chungchangah zawhna a awm deuh thung, a ti. Co- Chairman Pu Ronald Sapa Tlau pawhin thusawiin, DDCMC member te chu District a hnathawh tinreng fawng chelhtu, a neitu dik tak te in ni a. In thawh that chuan District in hma a sawn anga, thawh that loh chuan kan hnufum mai dawn ani. He District mipuite nghahfak chu nangni hi in ni, tiin member te thahnemngai taka thawk turin a ngen a. Hna tha in thawk duh a nih chuan Party mitmei rawn veng vak suh u, chhantu in nei zel dawn tih lo inhria ang che u, tiin a chah ani.

Vawiin meeting ah hian kumin sawrkar kum chhunga hnathawh hrang hrangte report pek ani a; a tlangpui chu hetiang hi ani.

PMGSY hnuaia Thingtlang khaw kawng laih mek Chhingchhip to Thentlang 97%, Hmuntha to Khawbel 73%, Chhingchhip to Hualtu 78%, Chhingchhip to Hmuntha 88%, E. Lungdar to Sailulak 99% te a thawh tawh an ni a. Serchhip to Hriangtlang 6% leh Chekawn to Lungchhuan 5% a thawh tan tawh an ni bawk.

Integrated Power Development Scheme (IPDS) hnuaiah Serchhip Power Division chuan hmun hrang hrang 18 ah hna an kalpui mek a, DDUGJY hnuaia SAGY village, Khawlailunga Electrict line thuam thatna pawh thawh zawh tawh niin Completion Certificate nghah mek ani.

National Rural Drinking Water Programme (NRDWP) hnuaiah PHE chuan khaw 7 ah tuilak hna a thawk mek a. Heng zinga Khawlailung WSS leh Tuichang WSS chu zawh tawh niin Lungkawlh, Thinglian, Neihloh, Hriangtlang leh Baktawng te thawh mek an ni.

Swachh Bharat Missions (Rural) hmalaknaah PHE Department chuan; 2012-13 ah ek in (IHHL) a sa a. SB kosh hnuaiah ek in hi 1346 a sa zo leh tawh a. Geo Tagging & Photo upload ah Mizoramah thawk tha ber niin Community Dustbin khaw 35 ah a dah tawh bawk. Serchhip District chu ODF ah puan tawh niin Mizoram ah Swachh Darpan ah 4 na, National level ah 44 naah a awm ani.

Swachh Bharat Missions (Urban) hmalaknaah Urban Development & Poverty Allevation Department chuan ek in (IHHL) 418 an sa zo tawh a, Serchhip District chu pawn lera inthiar awm lohna (ODF) ah ni 15^th September, 2017 khan puan a ni bawk a ni.

National Social Assistance Programme hnuaiah Serchhip & E. Lungdar ICDS Project chuan tar chawmna mi 1582 an pe mek a. Tunah hian diltu mi 302 an nei mek a. Hmeithai tanpuina mi 164 pe mekin dil thar tu mi 95 an nei mek a. Disable pension mi 47 hnenah pe mekin dil thartu mi 31 an nei mek bawk. Tin, National Family Benefit Scheme diltu mi 28 zingah mi 12 hnenah pek an ni.

National Health Missions hnuaiah District chhungah District Hospital 1, Community Health Centre 1, Primary Health Centre 5, Sub Centre 27 leh Sub Centre Clinic 7 a awm mek a. Review hun chhung hian naupiang 319 awmin an zinga 6 an boral a. Infant Mortality Rate hi 18.8 niin nu nauchunga boral (MMR) erawh a thleng lo ani. Serchhip District ah Measles - Rubella Campaign Dt 18. 04. 2018 atang khan hapta 5 chhung neih ani a. 96.93% pek niin Target data a fel loh deuh avang leh Sakawlh hlau mi thenkhat avangin beisei angin a hlawhtlinna percent hi a sang ta lo deuh nia sawi ani. January leh April 2018 inkarah HIV test ICTC ah mi 985 test an ni a, mi 20 in HIV an positive tih hmuhchhuah ani.

SSA Missions hnuaiah 2018-19 Academic Session ah Primary School naupang 1629 leh Middle School naupang 3047 te text book a thlawna pek an ni a, Uniform Grant Rs. 400 theuh naupang 2067 te hnenah pek an ni. Zirtirtute Grant mi 486 te hnenah Rs. 500 theuh pek niin zirtirtu indaih loh zualna school 5 ah special trainer dah an ni bawk.

Ni za inhlawhna hnuaiah kum 2017-18 chhungin ni 52 inhlawhna Ministry of Rural Development in a approved laiin, hnathawh that avangin ni 24 inhlawhna a rawn pek belh leh ta a. Hei hi District hmasawnna ropui tak a tling nia sawi ani. Hei vang hian ni za inhlawhna ni 76 zet neiin achievement rate pawh 131.61% a kai phah hial ani.

Tun Financial Year chhungin Thingtlang miretheite in sakna target 51 neih anih laiin Fund dawn a la nih loh avangin pekchhuah a la awm lova. 1^st April, 2016 atanga chhut erawh chuan mi 65 hnenah he tanpuina hi pek tawh an ni.

Border Area Development Programme (BADP) hnuaiah tun Financial Year atan Rs. 223 lakh dah niin Rs. 143 lakh dawn tawh niin hna chi 17 thawh niin an zinga hna 5 chu zawh fel tawh ani.

Hengte bakah hian vawiin meeting hian Serchhip District chhunga Central sum hmanga hnathawh dang te an sawi hovin, hmalaknaa harsatna tawh thin te, ruahmanna hmachhawp te leh thil dang pawimawh tam tak sawi ho ani.

He meetingah hian Pi Sangchhin Chinzah, Member Secretary DISHA leh Bawrhsap ni bawk te, Pu VL Remliana, Project Director DRDA leh memberte an tel ani.