Vawiin chawhma dar 10:00 khan Serchhip District Election Officer Pi Juhi Mukherjee, IAS hovin a pisa ah Serchhip-a Sawrkar Head of Department te Mizoram Inthlanpui lo awm tur atana ruahmanna awm te thlir ho niin Sawrkar Department hrang hrangte hnathawhho dan tur leh chanvo te sawiho a ni.

District Election Officer chuan inthlanna hlawhtling leh felfai nei tur chuan Sawrkar Department hrang hrangte thawhhona a that a pawimawh thu leh inpawh tlang taka thawh ho a ngaih thu a sawi a, tluang taka hma lak anih theih nan leh thawhhona ah inhriatthiam tawnna a awm that theih zawk nan October ni 28, 2013 atang chuan thuleh awm hma chu pisa kai ni ah chuan zing dar 10:00 ah Head of Departments zawng zawng te a Office chamber ah meeting neih ziah tawh tur ani tih thuchhuah anih thu a sawi bawk.

Vawiin thutkhawmah hian General Awareness Observer-in naktuka Serchhip a tlawh tur chungchangte, Expenditure Observer pathumin karleha Serchhip District an tlawh huna lo dawnsawn dan tur te sawiho a ni a, District Election Officer chuan inthlan buaipui turin State pawn atangin CRPF 190 vel Serchhipa an rawn kal tur thu leh Mizoram chhung atangin MAP leh IR Batallion atangin 140 vel an rawn kal tur thu te sawiin an thlenna tur leh khawsakna tur te ruahman a ni bawk. District chhunga Expenditure Monitoring Team te leh Video Surveillance Team te pawh October ni 30 ah chuan an awmna hmun tura awm vek tawh tur an nih thu te a sawi a, Sectoral Magistrate te pawh an bial chhung nikhat dana fang chhuak ziah turin leh mipuite a tam thei ang ber kawma boruak hrechiang thin turin a chah bawk.