Vawiin hian District Consultative Committee (DCC)/DLRC/DLSC Serchhip District chu an Chairman Pi Sangchhin Chinzah, Serchhip Bawrhsap ni bawk hovin an thukhawm a, kum kal ta 2017 September thla thlenga Serchhip District chhunga Bank hrang hrang te hnathawh dan chipchiar takin an thlirlet.

Pi Sangchhin Chinzah chuan, Committee member kalkhawm te chu kumthar chibai a buk a, meeting hnuhnung bera bank hrang hrangte hnathawh dan a that thawkhat thu sawi bawk. Amaherawh chu tun tum meeting report erawh chuan hmasawn aia hnungtawlh lam hawi deuh nia a hriat thu sawiin, bank te tan la thar leh turin a ngen a. Sawrkarin bank kaltlanga hmasawnna hna a thawh deuh vek tawh avangin bank lam an chak loh chuan mipuiten an tuar thei a ni tih hre thar leh theuh turin a ngen a ni.

Report a a lan danin Credit Deposit Ratio hi 2017 September thlaah khan 46.18% a ni a, quarters hmasa aiin 10.46% zetin a tlahniam a, CD ratio in a tlin ngei tura beisei zat (desired ratio) chu 60% a ni thung. District chhungah CD Ratio hi UBI in a tlin sang bera, 171.01% a ni a, MRB in 71.46% tlinin MCAB in 46.20% a tlin a. A tichhe ber chu SBI niin 42.86% a tlin a ni. District chhunga bank ten Deposit an hmuh tlingkhawm hi Rs. 20406.65 Lakh a ni a, heng atanga Advance an neih theihzat chu Rs. 9423.78 lakh a ni.

Agriculture lama loan pekchhuah zawng zawng (priority sector advances under Agri) hi Rs. 1593.24 lakh niin chu chu 16.85% ang a ni a. Bank hoten an tlin ngei tura beisei zat chu 18% a ni. An zingah MRB in pechhuak hnem berin Rs. 1378.42 lakh a pe a, MCAB in Rs. 189.71 Lakh, SBI in Rs. 260.16 lakh niin UBI in Rs.9 lakh a ni.

PMEGP kalpui chungchangah bank hrang hrangte dinhmun a tha lo tlang hle a, target 73 awmah mi 6 chauh pek hman niin Margin Money pawh Rs. 155 lakh zet a awm laiin a taka pekchhuah chu Rs. 7.89 lakh chauh a la ni. PMEGP hetiang dinhmuna District a awm chhan hi Bank lamte thiam loh ngawr ngawr nilova, a diltute zawkin harsatna hrang hrang an neih thin vang nia sawi a ni a. Tin, online a dil a ngaih tak avangin diltu pawh an tlem ta deuh nia sawi a ni. Stand Up India Scheme hnuaiah bank ten loan pek chhuah an nei lova, PMAY (Rural/urban) ah chuan Bank ten an thawk tha tlang viau thung.

Heng te bakah hian Financial Literacy Campaign te, KCC hmalakna te, DAY NRLM leh DAY NULM hmalakna te, MUDRA Scheme kalpui chin te, Adhaar Enrolment leh NaBARD loan kalpui dan te leh thil hrang hrang te sawi hova, thlirlet an ni bawk.

He meeting ah hian Serchhip SP Pu Lalringdika bakah Lead Bank Chief Manager Pu R. Ralkhuma, RBI Manager Pi Zina Baruah, AGM NaBARD Pu JS Daryani bakah District chhunga Bank zawng zawng Manager te, line Department te leh member dangte an kal tha hle a ni.