Vawiin khan Aizawl Press Club-ah Indian Film Festival January Ni 23-25, 2018 chhunga neih tur chungchangah press conference neih a ni a. He hunah hian UD&PA Minister Pu Zodintluanga, Planning & Programme Implementation Secretary Dr. C. Vanlalramsanga leh Innovation India Managing Director leh Indian Film Festival Mizoram Curator Captain Rahul Bali chuan press mite hnenah festival kalpui a nih dan tur an sawi pui a ni.

Minister Pu Zodintluanga chuan thu sawiin khawvel hmun hrang hrang a Indian film festival hlawhtling taka buatsaih thin tu Innovations India ten Mizoram ngeia Indian Film Festival an buatsaih tur chu lawmawm a tih thu a sawi a. India film siamtu lar leh hlawhtling tak tak, ram chhung leh khawvel huapa award lo dawng tawh te an tel tur thu sawiin mizo thalai hemi lama tui ten an hlawkpui ngei a beisei thu a sawi a. Khaw fai bera thlan Biate puala film tawi siam intihsiakna ruahman a nih thu sawiin film siam thiam tak tak ten film tha ber an thlang ang a, festivalah hian lawmman leh certificate sem a nih tur thu a  sawi a ni.

Film Festival in a tum ber chu film siamtu leh ram pawn ami ten Mizoram an hriatchian theih nan leh film siamtu thiam tak tak leh mipui ten film chungchanga inhrilhhriatna hun tha an neih theih nan a ni a. Swachh Bharat Abhiyaan kalpuina hnuaia hmalakna pakhat niin Biate khua pho lang thei tura film tawi siam intihsiakna ruahman a ni a, hemi intihsiakna a titha ber chuan lawmman atan nuaih khat leh certificate a dawng dawn a ni. Chief Minister Pu Lal Thanhawla’n January Ni 23 hian Vanapa Hall-ah Indian Film Festival Mizoram hi hawng tura beisei a ni.