Divisional Horticulture Officer, Serchhip buatsaih nihnih awh tur District Level Horticulture Exhibition, New Serchhip YMA Hall-a neih chu vawiin chhun dar 12:30 khan District Bawrhsap Pu P.Lalchhuanga’n hawngin, thlai thar pho lan te hi uluk takin a en chhuak vek a ni.

Exhibition hawnna inkhawma thusawitu District Bawrhsap chuan loneitute thlai thar phochhuaha a awm chu lawmawm a tihzia sawilangin, Serchhip District chhunga loneituten hlawhfa dang ruai lova anmahni thlai tharchhuah ngei an keng khawm chu ropui atihzia a sawi lang bawk.

Bawrhsap chuan Horticulture Department a thawktu thahnemngai tak tak ten zirtirna an pek leh Department atanga tanpuina chi hrang hrang an dawn te tha taka lo dawngsawng a hmang tangkaitute hnathawh a takin a lang tih sawiin, Sawrkar leh loneitu te inkarah thawhhona dik leh tha a awm phawt chuan a rah seng tur a awm zel a ni a ti a, Sawrkarin ruahmanna tha tak tak siam thin mahse a tihlawhtlingtute chu loneitute bawk an ni zel tih sawiin Serchhip DHO leh a thawhpuite leh loneitute thawhrimna, thawhhona tha in rah tha a chhuah mek zel a ni a ti a, Vairengte piah lam atanga thlai thar chawk luh reng ngai lova Mizoram laili atang ngei a thlai thar ten Zoram a chawm theih nan nasa lehzuala tan la turin loneitu kalkhawmte a fuih bawk a ni.

District-Level Horticulture Exhibition hi Sawrkar Laipui atanga ruahmanna lo kal Horticulture Mission for North Eastern Region kaltlanga buatsaih niin, Exhibition a senso atan hian tangka fai cheng nuaih khat leh sing thum (Rs. 1.3 lacs) sanction a ni a, he exhibitionah hian Horticulture Department kaltlanga hmalakna te pholan niin Horticulture Crop chi hrang hrang an pholang kim hle a, tun tumah hian thlai thar chi hrang hrang (Crop items) 22 ah lawmman siam a ni a, Serchhip District chhung hmun hrang hranga loneitu mi 168 ten an thlai tharte an pholang a ni.

Exhibitiona thlai thar pho lan te hi Category li – Vegetables, Flowers (House Plant leh Artistic), Fruit Crops leh Spices ah te then darh an ni a, DHO Pu Lalhmangaiha kaihhruaina hnuaiah endiktu (Judge) ruat bik ten uluk takin an en dik a, tehfung hrang hrang hmanga an teh hnu ah lawmman pakhatna atanga pathumna dawngtute thlang chhuakin a dang zawngin consolation prize an dawng a ni.

Lawmman pakhatna hian Thuziak (citation) leh tangka fai Rs. 1,000 a keng tel a, lawmman pahnihnain tangka fai Rs. 700, pathumna in tangka fai Rs. 500 a keng a, consolation prize atan mipakhat zelah Rs. 300 theuh sem a ni bawk.

Vawiin lawmman sem inkhawm hi Pu Lalhmangaiha DHO-in a kaihruai a, Judge pahnih Pu Lalnuntluanga HEO leh Pu K.Laltlanmawia AEO ten report pe in, lawmman te hi District Bawrhsap Pu P.Lalchhuangan a hlan a ni.