District Local Administration Officer, Serchhip District hmalaknain Serchhip District a khaw hrang hrang panga ah February ni 23, 2012 a Serchhip District a Village Council inthlanna neih tura Returning Officer te tan vawiin khan training buatsaih a ni a, Serchhip ah pawh D.C Meeting Room-ah training neih niin District Bawrhsap Pu P.Lalchhuanga’n training hi a hawng a ni.

District Bawrhsap chuan Returning Officer kalkhawmte hma a thusawiin hun chep tak karah VC Election buatsaih anih vangin theihtawp chhuah a tul a ni a ti a, an hnathawh turah an chian a pawimawh bakah inthlan huna harsatna an tawh loh nan an mawhphurhna san zia hria a thahnemngai leh dilchhut taka Training nei turin a chah bawk. Bawrhsap chuan electoral roll a tel a pawimawhzia mipuite hrilh hriat a tul thu sawiin, voters te hnena an mawhphurhna sawi tam a pawimawh thu leh mipuite rilru a election pawimawhna tuh ngheh a tul zia a sawi lang bawk.

Returning Officer te tana training hi Serchhip bakah, Lungpho, North Vanlaiphai, East Lungdar leh Chhingchhip ah te a rualin neih a ni a, Serchhip DLAO Staff ten insemdarhin training an pe a, Serchhip District chhunga khaw hrang hrang a RO tura ruat te chu Training na atana thlan chhuah khua te zinga an hnaih ber theuh ah an kal khawm a ni.

Serchhip-a R.O. Training hawnna inkhawm hi Pu S.T. Lalhmingmawia DLAO, Assistant District Election Officer ni bawkin kaihruaiin amah vekin Training hi a pe nghal a, Serchhip bikah chuan Serchhip leh a chheh vel khua atangin R.O 14 an tel thei a ni.