Ramchhung hmundangte rualin National Voters Day vawi 2-na chu Election Commission of India duhdan angin vawiin khan Mizoram pumah hman ve a ni a. Hemi ni puala hmanna pui ber Aizawl Vanapa Hall a inkhawm buatsaihah chuan Mizoram Chief Secretary Pu Van Hela Pachuau chu khuallian niin Voters Day thuchah a sawi.

Chief Secretary chuan Mizoramah inthlanna muanawm tak a awm thin hi India ram khawvela Democracy ram lian berah hian entawntlak a tling thin a ni tiin Election Commission of India fakna pawh kan dawng thin, a ti a. Mizorama inthlanna fel leh fai awm theih nana thawk thin kohhran, tlawmngai pawl leh MPF te chungah lawmthu a sawi a ni. Pu Van Hela Pachuau chuan inthlan kaihhnawih thila thawk tu, a bikin Electoral Roll hmingziak lut thin te mawhphurhna san zia sawi chhuakin khawvel ram dang tam takah chuan vote nei thei tura zalenna hi mipui mimir dawn phak a nih loh laiin kan ramah erawh chuan kum tling chin tu te pawhin zalen takin he chanvo hi an dawng thei a. Amaherawhchu, ram khua leh tui mi dik tak nilo, hming thunluh palh theih a nih avangin Electoral Roll lama mawhphurtu te chuan dik takin, hlauh leh venthawn nei lova an hna an thawh thin a tul a ni, a ti. National Voters Day-in a tum anga India khua leh tui dik tak, kum 18 tling chin tawh phawt chuan Electoral Roll ah inthun a, Vote pawh thlak ngei thin tura fuihin inthlan dan dik leh felfai taka kalpui thin hi mipui thlan sorkar sawhnghet tu a ni a, dik taka kalpui a nih loh erawh chuan Democracy pumpui ti derthawng tu a ni thei, Chief Secretary chuan a ti bawk.

Chief Electoral Officer Pu K. Riachho, IAS chuan Election Commission of India tobul leh pawimawhna te a tarlang a. Kum kalta atang khan National Voters Day hi ECI din ni January 25 chu rampumah National Voters Day ah hman thin tur a tih a nih tak thu leh he niah hian kum 18 tling chin India khua leh tui dik tak ten Electoral Roll inziah luh na chang an hriatna tur leh vote thlak hlutna leh pawimawhzia an hriat theih nan a zau thei ang bera inhrilhhriat thin a nih thu a sawi bawk.

He huna thusawi tu dang Mizoram People’s Forum Secretary Pu Lalbiakmawia Ngente chuan YMA ten inthlan ni khua a vote thlak tute tana thutna an buatsaih thin chu Election Commission of India meuh pawhin ngaisangin rampum huap inthlan kaihhruainaah Voter te tana thuthmun buatsaih thin turin thu a chhuah hial a ni, a ti.

Vawiin inkhawmah hian kumina vote nei thar zinga mi 20 te hnenah EPIC chu khuallianin a sem a. Kum kalta chhunga 100% EPIC chhuak thei District- Aizawl, Lunglei, Lawngtlai, Mamit leh Kolasib aiawh te hnenah Certificate hlan an ni a. Heti hian Mizoram pumpui chu 100% EPIC pe chhuak thei State a tling ta a ni. Aizawl District huamchhunga Booth Level Officer ti tha zual Lalhuliana, Sesawng-I; Robert Lalngaihawma, Chhinga Veng -II leh Rosangluaia, Thakthing te hnenah lawmpuina thuziak pek an ni bawk a. National Voters Day 2012 puala Higher Secondary School zirlai te hnena Quiz intihsiakna buatsaih lawmman dawngtu - Pakhatna- Govt. Mamawii HSS; Pahnihna-Zemabawk Govt. HSS leh Pathumna-Donbosco HSS, Bawngkawn hnenah lawmman tangkafai leh Certificate Pu Van Hela Pachuau chuan a hlan a ni.

Attachment

  • Loading attachment...