Vawiin chhun dar 11 khan Lawngtlai DC Conference Hall-ah 2nd National Voters’ Day hman a ni. District Election Officer Pu B. Lalhmingthanga, DC Lawngtlai chu Khuallian a ni a; Pu Vanlalngena, Addl. DC, Lawngtlai District in he hun hi kaihruaiin Pu Beila Khithie, Election Officer, Lawngtlai District chuan Report a pe a ni. National Voters’ Day thupuiah hian ‘Greater Participation for Stronger Democracy’ tih hman a ni a, kum 18 tlinga vote nei tharte hnenah EPIC sem nghal a ni.

Khuallian Pu B. Lalhmingthanga chuan National Voters’ Day tum hnihna kan hmang thei hi a lawmawm a ni tiin, India rama hnam leh sakhaw hrang hrang te huang khata kan khawsak theihna atana theihtawp chhuahtu India Hnam Pa leh hruaitu ropui tak tak te chibai bukna thu a sawi a. Democracy nihphung nemnghettu chu voter te hi kan ni a, vote neih hi a hlu tih hriain electoral roll-ah inziah luh theuh a pawimawh a ti a. Harsatna hrang hrang avanga electoral roll-a la inziak lut ve lo te pawh inziak lut tura sawmin National Voters’ Day hmangtute chu chutiang mite ziah luh an nih theihna atana tanpui turin a sawm a ni.

Lawngtlai District chhungah hian Constituency 3 a awm a. Draft Electoral Roll-a a lan dan chuan Lawngtlai District-ah hian voter 65,684 an awm a. Electoral Roll Revision neih hnuah dilna 2822 pawm niin mi 1092 pain an ni bawk a, voter 1730 a pungin punna hi 2.56% a ni. a. Lawngtlai District chhungah hian voter zawng zawngte EPIC siamsak vek an ni.

National Voters’ day lawmnaah hian Chief Election Commissioner thuchah chhiar chhuah a nih bakah Lawngtlai District chhunga political party hrang hrang hruaituten thu an sawi a. SSA Band ten mawi takin kalkhawmte an awi bawk.