Kolasib Project Veng AMFU Hall-ah vawiin khan 2nd National Voters Day 2012 hman a ni a, he hunah hian Kolasib DC Pi Niharika Rai, IAS, District Election Officer chuan a District chhunga A/Constituency pathum atanga BLO tha ber theuh thlan chhuah mi pathum hnenah Best BLO lawman- Citation leh tangka Rs. 1,000/- theuh a hlan.

National Voters Day hmanna inkhawm hi Pu JH Lalrimawia, Election Officer-in a kaihruai a. A kaihhruaina hnuaiah hian National Voters Day thutiam lakna neih a ni. Khuallian Pi Niharika Rai chuan thuchah sawiin Vote nei tharte a lawmpuina a hlan a. Kan thuneihna sang ber kan hman theihna chu Right to Vote hi a ni a. Kan hman that chuan mipui sawrkar tha leh rorelna dik kan siam thei a. Kan hman that loh chuan engmah sawi theih kan nei lovang, a ti a. Kan hman that chuan ram kalsiam sawi danglama siam tha thei khawp thil a ni tiin Voter tharte chu an mawhphurhna leh chanvo hre turin a chah a ni. BLO te thawhrimna chu fakin Pi Rai chuan in thawh that avangin Epic za a za kan District chhungah kan nei thei a ni, a ti a ni.

Vawiina Best BLO Award hlan takte chu :- Kolasib Consty. atangin Pu H. Lalrintluanga, Serlui atangin Pu Peter Lalchhanhima Sailo, leh Tuirial Consty. atangin Pu C. Zosangliana te an ni a. Kolasib district chhunga A/Consty pathum chhungah hian BLO 76 an awm a ni.

Pu Lalchungnunga, ERO, Kolasib pawhin thu sawiin Vote nei thei tura Electoral Roll a in thunluh pawimawhzia a sawi a. Electoral Roll-a lut tharte chu a lawmpui zia leh kawng hrang hranga khua leh tui tha ni tura mihring luanluhna a nih thu a sawi a ni. Khuallian Pi Niharika Rai hian Voters Day puala Election Commission of India thu chhuah a chhiar chhuak a. Kolasib Constituency chhunga Roll-a lut tharte hnenah Epic a sem bawk a ni.

National Voters Day hi vawiin vek hian Kawnpui leh Vairengte-ah te pawh hman a ni.