Vawiin chawhma dar 11:00 khan Co-Chairman Pu Lalhmingliana (MP Rajya Sabha) kaihhruaina hnuaiah Serchhip District Level Vigilance and Monitoring Committee meeting chu Serchhip DC Committee Room-ah neih a ni a, Chairman Pu CL. Ruala (MP Lok Sabha), Pu Lalthansanga MLA, Hrangturzo bialtu, Pu K. Lianzuala MLA, Tuikum bialtu leh Pu P. Lalchhuanga Serchhip District Bawrhsap leh Member Secretary ni bawk ten an tawiawm a ni.

He meeting-ah hian sawrkarin mipuite tana hmasawnna hna a thawhna programme hrang hrangte sawi ho a ni a. Inkhawm kaihruaituin meeting hun remchang an neih hun a nih avanga inhrilhlawkna hun tam awm lova meeting koh a ngai chunga Official an tel tha chu lawmawm a tih thu a sawi a, Committee hmasa lama thurel tawh bawhzui a nih dan te leh an hmasawnna te pawh enlet a sawi ho a ni.

He meeting-ah hian sawrkarin MGNREGS hmanga hna thawhnaah kawng laih chauha hma la lovin leilung hausakna haichhuak leh hmangtangkai tur a tan lak a tul thu te, Environment & Forest Department lamte nena tangruala ramngaw siam belh te leh a remchan dan anga MGNREGS park te pawh siam dan ngaihtuah nise a that thu te an sawi a ni.

He meeting-ah hian Pu Ruala, Chairman chuan tun hnai mai a Central lam atanga sawrkar hmalakna hrang hrang endik tura lo kal ten Serchhip District chhunga sawrkar hmalakna chungchanga an report chu chhuanawm a tih thu a sawi a. Scheme leh project engemaw zata ‘Excellence’ remark a awm chu district dang tana entawn tlak a nih thu uar takin a sawi a ni. Tin, DRDA Project Director pawhin IAY hmanga mirethei insakna Serchip District bik tana a tlem fal lutuk chu a hreawm rualin he scheme hi in leh lo nei lo chhungkaw awm zat (Shelterless Population based) atanga a dawng thei tur zat bituk a nih avangin alawmawm lama ngaih a tul thu a sawi bawk a ni.

He meeting-ah hian project hrang hrang atanga hna thawh dan duhthu sam lo deuh te chu enzui a siamthattir leh tur te, kut hna thawktute thlai chin tur thlan kawnga fimkhurpui an ngaih thute, IWDP leh IWMP hmanga Oil Palm chingtute innghahna Private Company te pawh, a concern department lamin belhtlak tak tak an nih leh nih loh te lo zir chiang se an ti a. Tin, Serchhip District chhunga National Family Benefit Scheme (chhungkuaa eizawngtu ber thihna avanga tanpuina) dawng tura thlan an tlem bik lutuk thin hi department hotute lamah bialtu MLA ten lo enzui pui se an ti bawk.