Cheap Labour kan duh avangin kan chhevel mite an lo lut nasa a, heng mite hi kan harsatna thlentu an la ni dawn – keimahni hi chawrtlaka kan insiam a ngai a ni. CL Ruala, MP, Lok Sabha.
Serchhip 17.09.2012: He thu hi Pu Ruala chuan vawiin chawhma dar 11 khan Co-Chairman Pu Lalhmingliana (MP Rajya Sabha) kaihhruaina hnuaia Serchhip District Level Vigilance and Monitoring Committee neihah a sawi a, MGNREGS hmanga hna kan thawhnaah kan zawmthawt thu te, hei hian kan work culture a tihchhiat nasat thu leh hetiang zela kan kal chuan hlawhfaa rawih tlak kan tlem tawlh tawlh dawn thu te sawiin keimahni hi chhawr tlaka kan insiam a tul tak zet thu a sawi a, Committee kaihruaitu Pu Lalhmingliana MP Rajya Sabha pawhin ‘Eng level emaw atang chuan Job Card nei lo ngam leh awt lo ngam tura kan inzirtir a hun tawh a ni’ a ti bawk.
Vawiin inkhawmah hian Serchhip District-ah sawrkarin mipuite tana hmasawnna hna a thawhna programme hrang hrangte sawi ho a ni a. Chairman-in meeting hun remchang an neih chhun a nih avanga inhrilhlawkna hun tam awm lo chung pawh a official-te inpuahchahna a tha chu lawmawm a tih thu a sawi a, committee hmasa leh tun inkara department hrang hrangte hmasawnna te leh an harsatna te uluk taka thlirin sawi ho a ni.
He meeting-ah hian DRDA Project Director Pu F.J. Liantluanga’n MGNREGS hmanga hna an thawhnaah sawrkar kum chanve chhunga ni 50 inhlawhna an pek tawh thu leh kumin lamah chuan ram ngaw siam lam beihpui an thlak thu te, khaw tinah MGNREGS Forest siam an tum thu leh a hmun tur pawh thlan fel vek a nih tawh thu te a sawi Chu Pu Hminga MP chuan lawmawm a tih thu a sawi a, sawrkar hmalakna a thingphun hi a dam khawchhuak an tlem thin thu sawiin uluk taka enkawl chhunzawm turin a chah a ni.
Pu Ruala MP chuan IAY dawngtu tur thlan chungchangah Waiting list chu a danglam fo thin thu a sawi a, he tanpuina dawngtu tur thlan danah mipui kal khawmin a thlan dan tur dik takin an thlang thin tak zet em tih enfiah thin turin official-te a chah nawn leh a, tin Computerization of Land Records chungchang pawh sawi langin, kan ram hmasawn tura a insingsak mek lai hian he thil hi a la pawimawh dawn chauh avangin a changtu department ten a rang thei angin hma lo lak tum rawh se a ti bawk.
He Meeting, DC Committee room-a Co-Chairman Pu Lalhmingthanga kaihhruai hi Chairman Pu C.L. Ruala, Pu Lalthansanga MLA, Hrangturzo bialtu leh Pu Lalsangliana Member Secretary leh Serchhip District Bawrhsap ni bawk ten an tawiawm a, nimin lama boral ta, Pu Chawngtinthanga, Parliamentary Secretary chu an ui thu leh a boral ta chu pawi an tih tak zet thu sawi lan a ni.
