Serchhip District chhunga Village Level NLUP Monitoring Committee-te hnenah Vawiin khan NLUP endikna kawnga a tul anga an hman turin Contingency Fund pekchhuah an ni a. He Fund pekchhuahna hi DC Conference Hall, Serchhip-ah neih a ni.

Village Level NLUP Monitoring Committee te tana Contingency Fund hi NLUP Implementing Board in sem dan tur an ruahman sa angin Serchhip District chhung khaw tina VLMC te hnenah hian pekchhuah a ni a, hemi ang hian In 250 chin hnuailam te hnenah Rs. 2000/- theuh, In 250 atanga In 500 chin te hnenah Rs. 3,000/- theuh leh In 500 atanga In 1000 chin te hnenah Rs. 4,000/- theuh pek an ni a, in 1,000 aia tam awmna khuate chu Rs. 5,000/- pek an ni bawk a, a vaiin Rs. 1,27,000/- semchhuah a ni.

Vawiin a heng sum pekchuahna inkhawm neih anih rual hian Village Level NLUP Monitoring Committee-ten DC Office-a Quarterly Report an pek dan tur Format siamsa chu semchhuah nghal niin hemi chungchang sawifiahna hi neih zui nghal a ni bawk a, he huna tel Monitoring Committee te chu Report thehluh ngai pawimawh tur leh dik taka Report siam tura chah an ni. Zawhna leh rawtna awm apiang chhan a ni a, sawihona tha tak neih a ni bawk.

Vawiin a he sum pekchhuahna inkhawm ah hian Serchhip District chhunga Village Level NLUP Monitoring Committee te an tel tha hle a ni.