Nimin khan Serchhip District Election Officer Pi Sangchhin Chinzah, District Bawrhsap ni bawk chuan 2nd Special Summary Revision, 2018 atana Serchhip District Draft Roll chu a pisaah a tlangzarh.

Pi Sangchhin Chinzah chuan, kan hriat angin kumin hi kan inthlan kum a lo nih leh ta a, kan District chhunga vote thlak thei khua leh tui zawng zawngte Electoral Roll a kan chuan a, vote kan thlak vek theih nan theihtawp chhuaha beih a ni leh dawn a. Chumi atana hmalakna 2nd Special Summary Revision chu kan nei leh dawn a ni, kuminah he Revision hi a tum hnihna a nih avangin 2nd Special Summary Revision tih a ni a, khua leh tuite kum tehna hunbi atan 1.1.2018 a kum 18 tling chin chu hman tur a ni ang, tiin Roll Revision neih chhan leh neih dan turte a sawifiah a. He Revision neih chhung Dt. 31.7.2018 atanga 21.8.2018 chhung hian inthun thar duhte, hming siamthat ngaite, paih ngaite ang chi reng reng te chu mahni khuaa BLO te kaltlangin bawhzui tur a ni ang. 

Serchhip District chhungah hian Assembly Constituency pathum 26- Serchhip, 27- Tuikum leh 28- Hrangturzo te an awm a, heng bial pathuma vote awm zawng zawng (Draft roll) chu 48,954 niin an zinga 24,837 chu hmeichhia an ni. Assembly bial tinah hian hmeichhe voters an tam zawk vek nghe nghe a ni. District chhungah hian Polling Station 77 a awm a, Serchhip AC ah 23, Tuikum AC ah 29 leh Hrangturzo AC ah 25 te an ni. Polling Station zingah Buhkangkawn Station ah voter tlem berin 81 an awm a, Thenzawl IV station ah voter tam berin mi 1,306 an awm thung a ni. Electors- Population Ratio (mipui 1000 zelah voters awm zat) 601 a ni a, Draft Roll a chuangte sex ratio hi 1042 niin Census 2011 population sex ratio kha chu 982  ni thung.

Vawiina Draft Roll tlangzarhnaah hian Pu Lalvenhima, Election Officer chuan Serchhip dinhmun tlangpuite, hmalak dan turte leh inbuatsaihna neih dan te a sawifiah a. Serchhip District-a ERO, AERO, Election Branch thawktute, tlawmngaipawl leh MJA aiawhte, Political Party  hrang hrang aiawhte an tel a ni.