Nimin khan chhunga khaw hrang hrangten My Project, My NEDP hnuaia inelna an neih Mipui Mamawh Intawn Ruahmanna (MiMIR) titha zual 20 thlan chhuah ten DC Conference Hall-ah an Project te sawifiahna hun an nei a, tlaiah result puan nghal niin Thenzawl West Village MiMIR Committee ten an thehluh “Loom upgradation & Product Diversification” Project chu thlan a ni.

MiMIR inelna ah hian Serchhip District chhunga Village Council 49 awm zianga Village Council 44 ten an Project te an thehlut a, District MiMIR Committee chuan heng Project thehluh atang hian Project tha zual 20 thlang chhuakin, vawiin hian heng Project 20 thehluttute hian an Project te sawifiahna, Presentation, DC Conference Hall ah, District MiMIR Committee hmaah hian an nei a. Vanchengpui khua tih loh midang zawngten Presentation hi an rawn nei thei a ni. District MiMIR Committee member te hian mark lo pe nghal zelin Presentation neih zawhah a titha ber Project puan nghal a ni a. Thenzawl West MiMIR Committee ten an khawtlanga Puantaha eizawngtute puantah quality tihsan nan te, a market zau zawk leh an puantah rate mumal zawka hmalakna tur te. An puantahte hmeichhe bih atan chauh nilova mamawh danga hman theih tura tahchhuah dan tur ruahmanna an rawn siamte chuan mark  a hmu sang ta ber a ni.

Result puanna hunah hian Serchhip Bawrhsap Pi Sangchhin Chinzah, District MiMIR Committee Chairman ni bawk chuan, khaw tinten an khawtlang mamawh, an hmasawnna tur ruahmanna an rawn siamte chu ruahmanna pawimawh leh tangkai tak vek an ni tih sawiin, khawtlang hruaitute inpekna leh thawhrimna chu chhuanawm  a tih thu a sawi a. Khang Project te atang khan kan District chhung mamawh tam tak kan hriat phahin nasa takin min ti bengvar a, a hlu em em a ni, a ti a. Project pakhat chauh thlan chhuah theih a nih avangin kan rilru a tibuai ru hlawm hle a ni, tiin Project thehluhte a thatzia leh a hlut zia a tarlang a ni.

My Project My NEDP  ruahmanna awmsa angin Project tha ber thlan chhuah hi a kaihhnawih Department ten uluk takin Detail Project Report an siam sak anga, thuneitu sang zawkah thehluh tur a ni dawn a ni.