Election Commission of India in Mizoram Legislative Assembly inthlanpui lo awm tur a Serchhip District a inthlan chuh tu (candidate) ten dan dik taka Campaign sum an hman leh hman loh endik a vil tura a ruat,Election Expenditure Observer, Mohammad Ghayas Uddin, IRS chuan naktuk hian Serchhip a tlawh dawn.

Vawiin chawhma dar 10:00 a Serchhip a Head of Departments ten inthlan lo awm tur chungchanga meeting an neih ah Serchhip District Election Officer Pi Juhi Mukherjee, IAS chuan he thu hi a sawi a, Expenditure Observer hi zaninah Aizawl ah riakin naktuk zingah Serchhip a pan ang a, naktuk chawhnu dar 1:00 ah Serchhip DC Office ah Inthlan chhung atana Assistant Expenditure Observer te leh Accounting Team zawng zawngte nen inkawmhona hun an hmang ang. Expenditure Observer hi Serchhip ah November ni 5 thleng a cham phawt ang a, Delhi lamah kir leh in November ni 12 ah a rawn let leh ang.

Vawiin thukhawm hian polling personnel welfare chungchang te, vote chhiarna hmun tur DC Office Complex sawngbawl chhunzawm zel dan tur te, state pawn lam atanga Inthlan duty a rawn kal tur CRPF te lo dawnsawn dan tur chungchanga hmalakna thlirhona te an nei a, hei bakah hian November thla laihawl hian Chhingchhip leh Serchhip-ah mipuite vote thlak tura inzirtirna leh vote thlak ngei tura intiamkamna hun hmangin public rally neih tura ruahman lailawk a ni a; hetiang public rally tho hi Inthlan hmasa a District chhunga vote tlakchhiat zualna khaw panga ah neih bawk tura ruahman a ni.