Vawiin hian Pi Sangchhin Chinzah, District Election Officer, Serchhip chuan a pisaah Electors’ Verification Programme (EVP) hawnna leh Press mite hnena EVP chungchang hrilhfiahna (Press Briefing) a nei.

Pi Sangchhin Chinzah chuan, democracy lungphum pawimawh, khua leh tui dik tak ten kokim taka ram roreltute kan thlan theih nan Election Commission of India chuan Electoral Roll a buatsaiha, kum tin Summary Revision neiin siam that ngai leh tihdanglam ngaite khawih thin an ni. Chumi hmalakna kal zelah chuan ECI in Electors Verification Programme (EVP) rawn duang tharin electors ten internet hmangin E- Roll a an hming leh an nihna inziak dik tawk lote an en zung zung thei dawn tawh a, siamthat duh an neih te pawh online vek hian awlsam takin an dil zung zung thei tawh dawn a ni, a ti. Chu EVP chu vawiinah Serchhip District-a hman tan turin kan tlangzarhin Chanchinbumite hnenah a chinchang inhrilhfiahna kan buatsaih a ni, a ti. Pi Sangchhin Chinzah chuan, National Voter Service Portal ah mahni in register in E- Roll a kan chanchin inziakte kan enin a tul kan tihte thlak leh siamthat kan dil thei a, dilnaa thil tel ngai document pawh mahnia upload mai theih a ni, tin, Voters Helpline Mobile App download-a in register in a tih theih bawk a, Internet mahnia khawih thiam lo emaw harsatna nei tan Common Service Centre-ah te tih theih a ni bawk a, mahse CSC ah hi chuan a awm tawk pawisa chawi ve a ngai thung ang. Tin, Electoral Registration Officers te thut hmunah Voters Facilitation Centre din vek a ni bawk a, chung hmunah pawh chuan tih theih a ni ang. BLO ten an tana siam bik BLO Apps hmangin in tin tlawh chhuakin geo-tagging te an tinghal zel bawk dawn a ni, tiin Elector Verification Programme kalphung tur sawifiahna a nei a ni.

He hunah hian Election Officer Pu Vanlalhmachhuana pawhin thusawiin, EVP kalpui tura Election Branch lam inbuatsaih tawhna te, Special Summary Revision pawh kan hma maiah kalpui tan a ni leh tur thute leh EVP chu mipuite awlsamna nasa tak thlen theitu a nih avanga mipuiten hre zauvin hman tangkai nachang hria se a duh thu te a tarlang a ni.

Chanchinbumi kal khawmte hian an hriat chian duhte zawtin mipuiten EVP an hman tangkai theih dan tur nia an hriatte pawh an sawi hlawm a ni.

He hunah hian Pu C. Ramengmawia, President MJA leh Serchhip MJA members dangte, DDK aiawh te, Serchhipa Televisions aiawhte bakah ERO leh AERO te an tel a ni.