Vawiin khan Serchhip khaw chhunga Leilet neitute tan Farmer’s Identity Card semna leh kum 2011 chhunga Serchhip khuaa System of Rice Intensification(SRI) leh Improve Pakages (IP) hmanga buh chingtute tanpuina pawisa DC Conference Hall, Serchhip-ah sem a ni.

He inkhawm hi Pu Zokhuma Varte, SDAO Serchhip chuan a kaihruai a. Pu P. Lalchhuanga Deputy Commissioner, Serchhip chuan a hmanpui a; loneitute hnenah ‘Farmer’s Identity Card’ a sem nghal a ni.

Bawrhsap Pu P. Lalchhuanga chuan loneitu ten awmze nei zawka hmalakna an kalpui theih nan te leh a phu ngei ten tanpuina an dawn theih nan te, awmze neia tanpuina sem theihna tura ‘Farmer’s Identity Card’ leh Beneficiary Card, Agriculture Department-in a buatsaih thei chu lawmawm a tih thu a sawi a, Department dangte tan pawha entawntlak a nih thu a sawi. Loneitu kalkhawmte chu sawrkar leh Department kaltlanga tanpuina kan hmuh leh dawnte rinawm taka hmang thin turin a chah a, tanpuina sum te hi a nihna ang taka kan hman phawt chuan kan ram hian nasa takin hma a sawn thei dawn a ni a ti. Tin, ram dang atanga buh leh thlai kan lakluh thin te titlem tura tan la turin loneitu kalkhawmte chu a chah bawk a, ram danga sum tam tak luangral thin te hi titlem a, mahni intodelh thei tura nasa lehzuala tan la turin leh inbuatsaih thar leh turin a chah a ni.

Pu Lalthansiama, DAO Serchhip pawhin thu sawiin ‘Farmer’s Identity Card’ an siam chhan chu loneituten an mamawh chi hrang hrang an neih theih nan te, a mamawhtu ngei te leh a thawktu ngei ten an chanai dik tak an chan theih nan a nih thu a sawi. Tin, he hunah hian Beneficiary Card pawh pe chhuak tel nghalin, he card hi Department kaltlanga loneitu ten tanpuina an dawn reng reng chhianchhiahna tur a nih thu a sawi nghal bawk a ni.

Mizoram sawrkarin kum 2011 hi Buh thar tam kumah a puanga, hemi bawhzui hian leilet neitu te chu SRI leh IP hmangin buh chintir an ni a. Hemi tanpuina atan hian Central Sponsored Scheme (CSS) hnuaia MMA kaltlanga pawisa Department in a dawn atangin vawiin hian lelet neitu chhungkaw 202-te hnenah Farmer’s Identity Card rual hian Rs. 850 theuh tanpuina hi sem nghal a ni a. Tanpuina pawisa hi RKVY Scheme atangin leilet neitu te hnenah hian sem chhuah leh tura ruahman mek a ni bawk a ni.

Vawiina SRI leh IP hmanga tanpuina pawisa sem chhuah zawng zawng hi Rs.96050 a ni a, Serchhip District-a khaw hrang hrang 18 a leilet neitu chhungkaw 667 te hnenah December thla chhungin Rs.566950 ‘Farmer’s Identity Card’ nen sem chhuah leh tum a ni.