Research & Development Programme, Academy of Integrated Christian Studies (AICS) buatsaih lehkhabu ‘Hlemhletna (Corruption) leh Mizo Kristiante’ chu vawiin khan I&PR Auditorium-ah Chief Minister Pu Lal Thanhawla’n a tlangzarh.

Khuallian Chief Minister chuan Mizoram ei chhe mektu leh Mizoten kan natna vei mek ‘Corruption’ hi hlemhletna, zawmthawtna emaw kut tling lova sum lakluhna angin a sawi theih ang a, AICS-in Mizo Kristiante leh hlemhletna chungchang vei a, Mizo mipuiten thinlung taka corruption do duhna pu se tia lehkhabu an buatsaih thei hi a lawmawm hle a ni, a ti. Mipui mimir leh mimal te nitin nunah pawh a tlem thei ang ber thawh a, a tam thei ang ber hlawh lak tum si rilru pu an tam tawh a, khawpuiah chuan sum hi a zawnin an zawng a, thingtlangah lah a nghaha nghah chhuah tumin nun kan hmang chho ta hi a pawi a ni, a ti bawk. Rampum ngaihtuah pawhin khawvela hlemhlet hluarna ram 137 zingah India chu 87-na a dah a ni a, hei hi ram sorkar leh mipuite pawhin ngaimawhin thudik hailan theihna tur hmanrua tha tak Right to Information Act te duan a ni ta a, tunah hian Lokpal Bill chaiin rampum a buai mek bawk a. Amaherawhchu hmun sang leh thuneitute zingah chauh hlemhletna hian bu a khuar tawh lova mipui mimir thlengin zawmthawtna hian nasa takin min sal bet tawh niin a hriat a, do let tura hmalakna hrang hrang ten rah nei tak tak tur chuan sorkar emaw thuneitute chauh ni lovin mipui leh mimal tin ten theihtawp chhuaha dikna, rinawmna leh taimakna kan um a ngai a. Mi hausa leh mi rethei inkar zau mek siamthatna hna pawh hi sorkar chauh ni lovin mipui zawng zawngte mawhphurhna a ni tiin Chief Minister chuan kalkhawm te a fuih a ni.

Mizorama hmasawnna hna tam tak a thuanawpna chhan chu corruption a ni a, hei hi sorkar hnathawkte zingah chauh ni lovin mipuite zingah pawh kut tling lova sum lakluh tum an awm thin vang a ni, a ti. Mizorama cheng mihring nuai 10 vel zingah nuai 2 chu state pawna mi, kan rama hnathawka eizawng, ram pawisa thawn chhuak thin an ni a, hei hi kan ram leh hnamin a tuar mek bawk a ni, a ti. Hnam leh sakhaw dangin Kristiante chu mi dik, rinawm leh hlemhletna atanga fihlim ni tura min beisei laiin hlemhletna avanga man, hna atanga ban/suspend emaw hmingchhia te zingah pawh kohhrana inhmang tak tak, kohhran rawngbawltu te an awm thin hi a pawiin a zahthlak hle a ni tiin Chief Minister chuan Mizote chu kan hnam leh Kristianna chawisanga rinawmna leh taimakna um zel tur kan zawk a ni tih hre reng turin a chah bawk.

Vawiina tlangzarh tak ‘Hlemhletna (Corruption) leh Mizo Kristiante’ hiResearch & Development Programme, Academy of Integrated Christian Studies (AICS) hmalaknaa chhuak lehkhabu 5-na a ni a. Bible leh khawtlanga thlirna hrang hranga atanga ziah Seminar Paper 14 zet he lehkhabuah a chuang a ni. Tlangzarh inkhawm hi Rev. R. Zolawma-in a kaihruai a, Prof. Dr. R.L. Hnuni, Principal, AICS-in hunserh hmangin lehkhabu buatsaih a nih dan chu Rev. Vanlalchhawna Khiangte-in a sawi a ni.

Attachment

  • Loading attachment...