Mizoram Supply Executive Association chuan vawiin khan Tourist Lodge Chaltlang-ah General Conference vawi 9-na an hman a. FCS&CA Minister Pu H. Rohluna’n a telpui.

Conference hawnna thuchah a sawi ah FCS&CA Minister Pu Rohluna chuan sawrkar laipui a Food Minister Pu K.V. Thomas hnena a ngenna tihhlawhtlin anih tak thu leh chumi ang chuan APL buhfai 160000 qtls, kg 1 ah Rs. 11.85 in kumin chhunga phurh hman turin pek belh a nih thu te, chini pawh thlatin quota 6660 qtls. atangin 10000 qtls tura hmalak mek a ni a ti.

Pu Rohluna chuan ration card dik tak siam tura hmalak mek a nih thu sawi langin thil tidik lo titu thawktu lamah hmuh anih chuan action lak a ni ang a ti. Kumthar lamah buhfai hnianghnar zawk sem tum a nih avangin thawktu lam te pawh tun aia nasa zawka inpe thar turin Minister chuan a fuih a ni.

Vawiin a conference chawhnu lamah hian thu pawimawh hrang hrang an rel a chung zingah chuan Digital Weighbridge, Mizoram Family Ration Card (Entitlement, Registration, Inclusion & Deletion) Act leh Mannual hman mek ang a posting chungchang te a tel a. An pawl chhunga inrelbawl dan leh an danpui hman mek siam that rawtna te a tel bawk. Hruaitu thar thlan an nei nghal bawk a ni.