Vawiin chawhma dar 11:00 khan Deputy Commissioner’s Office Chamber, Saiha ah kum 2012 January ni 1 leh ni 4 inkara hman tur ‘Accidents bring tears Safety bring cheer’ tih thupui hmanga ‘Kawng Ralmuanna Hapta’ Road Safety Week, Saiha a hman dan tur chungchang ngaihtuahin District Bawrhsap Pu Kunal IAS kaihhruaina hnuaiah meeting neih a ni.
He meeting hian Hapta hman chungchanga programme hrang hrang hman turte duang lawkin kawngpui sira mimal bungrua mipui tana hnawksak te pawh thenfai tum a ni a. He week hi India ram pumah a ruala hman tur a ni a. Week chhung hian Awareness Campaign, New Saiha Vety Kawnah leh Saiha Bazar Traffic Point ah te neih tum a ni bawk. Saiha khawpui chhunga kawngchhe zual lai Congress Bhavan leh I & PR Office inkarte chu siamtha turin PWD te chu ngen an ni a, week chhung hian ‘Best Driver Award’ heng Bus, Taxi, Sumo leh Auto Rickshow ah te hian thlan chhuah a lawmman pek tum an ni. Chanchinbumite tan slogan inphuahsiakna Mizo leh Mara tawnga buatsaih tum a ni a, lawmman tha tak buatsaih tum a ni. Week chhunga lirthei lama buaina leh harsatna thleng a awm thulhah DC Office Tall Free Telephone No. 1077 ah thlen thuai tura ngen a ni. Mipuite hnena thuchah District Bawrhsap in he week neih chhung hian Cable TV kaltlangin a sawi bawk ang. Saiha khawpui chhunga Driver te tan Medical check-up leh eyesight testing camp he week chhung hian neih tum a ni bawk.
He meeting ah hian SP Saiha, Department hrang hrang hotu te, Saiha chhunga Vehicle Owners Association hrang hrang hruaitute leh chanchinthar thehdarhtute an tel a ni.
