Vawiin chawhma dar 11:00 khan Serchhip District Horticulture Office Training Hall, Serchhip Chanmari vengah loneitu thlan bik mi 60 te tan thlasik thlai chin dan zirtirna pek an ni. He hun hi DHO Pu Lalhmangaiha chuan a kaihruai a, loneitute hi Centre of Excellence hnuaia Horticulture Mission for North East and Himalayan Region (HMNEH) 2012-2013 atanga tanpuina dawngtute an ni.

Pu Hmaa chuan loneitute chu tanpuina an dawnte a tangkai thei ang bera hmang turin a chah a, he scheme hi kum khat atana tih a nih avangin tunah chuan a hnu kharna lam a ni tawh a, tanpuina dawn tur pawh an sem zo thawkhat tawh tih sawiin an dawn tawhte atanga an dinhmun theuhte siam that tum turin a chah a, mimal tinte hlawhtlinna chu hmuhpui ve ngei tumin department chuan beiseina nen a lo thlir reng dawn a ni a ti.

He training-ah hian Horticulture Extension Officer Pu R. Lalmuanpuia chuan zirtirna a pe a, tin loneitu kal khawmte hnenah hian thlai chi; French Bean leh French Mustard bakah Sign Board leh pawisa fai cheng 2100/- theuh an sem bawk a ni.