Govt. T. Romana College leh Mizoram English Literary Society (MIELS) te buatsaih ni hnih awh tur UGC Seminar ‘Narrativising Cultures of the North East: Indigenous to Contemporary’ chu Art & Culture Minister etc Pu P.C. Zoram Sangliana’n September 3, 2013 ah I & PR Auditorium ah a hawng.

He Seminar hi September 3 & 4, 2013 chhung a neih tur a ni a, India hmarchhak chungchang a thuziak leh literature a kawng hrang hranga tihlan a nihdan te zirho a ni ang. Seminar hmang tur hian mithiam tak tak Nagaland, Guwahati, Shillong leh Mumbai atang te in an rawn tel a. MZU hnuaia III Semester zirlai ziaktu te zinga mi Sebastian Zumvu pawh a rawn tel avangin Seminar dang ang lo takin Aizawl a College 6 a English zirlaite pawh sawm an nih angin an rawn tel. Hawnna inkhawmah hian Chief Guest Pu P.C. Zoram Sangliana chuan India hmarchhak hi ramchhung leh rampawn ami te’n an la hrechianglo hle a, media lamah pawh tarlan dan a inanglovin a diktawklo fo thin a. Khua leh tui tha tak ni tur chuan keimahni pawh hian North East India hi hnam inanglo tak tak, inzawmna nei si kan ni tih ah hian kan chian a ngai a. India ram zau zawkah pawh leng tak leh tlangnel taka kan awm zui zel theihna turin mithiam, lehkhaziakmi leh zirmi te hian tan kan lak a tul ta takzet a ni a ti. Sawrkar lam pawhin theihtawp a lo chhuah tawh thin a, State sawrkar mal leh North East Zone Cultural Centre te’n hmarchhak state 8 te inunauna leh rampawn lam pawha inhriatthiamna nasa zawk kan neih theihna turin nasa takin hma an lo la ve tawh thin a ni a ti bawk.

Hawnna inkhawmah hian Pi Margaret Ch. Zama, MZU in Key Note address pe in, Govt. T. Romana College Principal Dr. F. Lalhmingsanga leh Seminar Co-ordinator Jenifer Lalbiakdiki te’n thu an sawi bawk. Seminar a mithiamte thuziak hi a bu a tihchhuah tura buatsaih a ni dawn bawk.